बाराको निजगढ नगरपालिका– १३ भक्तलाल खोलाको बगरमा शनिवार राती प्रहरी र गाँजा तस्कर समूहबीच गोली हानाहान भएको छ ।

राती करिव १० वजे ८/१० जनाको समूहमा रहेका लागुऔषध तस्करहरुले प्रहरीलाई देख्ने वित्तिकै गोली चलाएका थिए । तस्करले प्रहरीमाथि गोली चलाएपछि प्रहरीले जवाफी फायर गरेको जिल्ला प्रहरी कार्यालय बाराका डिएसपी गौतम मिश्रले वताए । तस्करहरुलाई लक्षित गरी प्रहरीले चाइनिज पेस्तोलबाट ५ राउन्ड हवाई फायर गरेको उनको भनाई छ । 

त्यसक्रममा प्रहरीले मकवानपुर हेटौंडा उपमहानगरपालिका–६ का ४७ वर्षीय इमानसिंह तामाङलाई पक्राउ गरेको छ । तामाङको साथबाट १ थान भरुवा बन्दुकसमेत बरामद भएको प्रहरीले जनाएको छ । घटनास्थलबाट ५ वटा सेतो बोराभित्र लुकाइ राखेको १०२ किलो अवैध लागुऔषध गाँजा पनि बरामद भएको डीएसपी मिश्रले जानकारी दिए ।

तामाङविरुद्ध हातहतियार खरखजाना र लागुऔषध नियत्रण ऐन, २०३३ बमोजिम थप अनुसन्धान सुरु गरिएको छ । फरार अन्य अभियुक्तको खोजी भइरहेको मिश्रले जानकारी दिए ।