नेपाली कांग्रेसका उपसभापति विमलेन्द्र निधिले सर्वोच्च अदालतले संसद विघटनको पक्षमा फैसला गरे निर्वाचनमा जानुको विकल्प नभएको वताएका छन् ।

नेपाल प्रेस युनियन धनुषाले मंगलबार जनकपुरधाममा आयोजना गरेको पत्रकार सम्मेलनमा निधीले संसद विघटन असंवैधानिक कदम भएपनि निर्वाचन संवैधानिक व्यवस्था भएको वताए । उनले प्रतिनिधिसभा विघटनाको सम्बन्धमा सर्वोच्च अदालतले छिटो फैसला दिनुपर्ने बताए ।

सर्वोच्चबाट संसद पुनर्स्थापना वा निर्वाचनको जुनसुकै निर्णय आए पनि मान्न तयार रहेको बताए । प्रतिनिधिसभा विघटन असंवैधानिक भएको दाबीसहित सर्वोच्चमा एक दर्जन बढी रिट परेका छन् । ती रिटहरुमाथि संवैधानिक इजलासमा सुनुवाइ हुँदै आएको छ ।

‘प्रतिनिधिसभा देशलाई चाहिन्छ’ उनले भने–‘त्यसैले लोकतन्त्रमाथि विश्वास गर्ने कांग्रेस निर्वाचनमा जान्छ ।’ चुनावमा जानुपरे कांग्रेस संघीयता, गणतन्त्रको सम्बद्र्धन र जनताको दुःखको मुद्दालाई लिएर जाने उनको भनाई छ। 

अदालतबाट संसद विघटन सदर भएर पनि सरकारले चुनाव नगराए आन्दोलनमा जानुपर्ने उनको भनाइ थियो । 

निधीले वैशाखमा घोषणा गरिएको प्रतिनिधिसभा चुनावपछि मात्रै पार्टीको महाधिवेशन हुने बताएका छन् । ‘संसद पुनःस्थापना नभए चुनावमा भाग लिएर महाधिवेशनको तयारीमा लाग्नु पर्छ’–उनले भने। कांग्रेस आगामी फागुन ७ देखि १० सम्म अधिवेशनको मिति तोकेको छ ।