माछा मार्ने विवादमा भएको झडपमा परी एक महिलाको मृत्यु भएको मुद्दामा सप्तरी जिल्ला अदालतले एक जना अभियुक्तलाई पुर्पक्षका लागि कारागार पठाउने आदेश दिएको छ ।

हत्याको आरोप लागेका सप्तरीको बोदेबरसाईन नगरपालिका –३ कुशमाहारका रबित कुमार मण्डललाई पुर्पक्षका लागि थुनामा राख्ने आदेश भएको हो ।

स्थानीय जोगिन्द्र मण्डलकले दिएको जाहेरीका आधारमा जिल्ला प्रहरी कार्यालय सप्तरीले मण्डलसमेत ४ जना विरुद्ध हत्या र हत्या उद्योगको मुद्दा दर्ता गरेको थियो । प्रतिवादीहरुले जोगिन्द्रकी भाई बुहारी गंगिया देवी मण्डललाई घरेलु हतियार प्रहार गरी हत्या गरेको प्रहरीले जनाएको छ ।

प्रहरीका अनुसार आक्रमणमा गंगीयाको घटनास्थलमै मृत्यु भएको र जाहेरवाला जोगिन्द्र मण्डल, सुवेन्द्र मण्डल, जय नारायण मण्डल  र धिरज मण्डल घाईते भएका थिए । सोहि आरोपमा मंसिर २८ गते प्रहरीले रबित कुमार मण्डल, शिवचरण मण्डल, सुरेन्द्र मण्डल र बिजय मण्डललाई पक्राउ गरेको थियो ।

सप्तरी जिल्ला अदालत राजविराजको पुस २७ गतेको आदेशले पक्राउ परेका मध्ये रबितलाई पुर्पक्षका लागि थुनामा राख्न पठाईएको र अन्य ३ जनालाई जनही ५० हजार धरौटीमा छोडिएको जिल्ला प्रहरी कार्यालय सप्तरीका डिएसपी भुवनेश्वर प्रसाद साहले वताए ।

पुस २८ गते राती कुशमारटोलमा सार्वजनिक पोखारीको माछा मार्ने बिषयमा झडप हुँदा गंगीयाको मृत्यु भएको थियो । 

ठेक्का लागेको पोखरीमा सहमति विना माछा मारेपछि अर्को पक्षले रोक्न खोज्दा विवाद भएको वडा अध्यक्ष अनोज कुमार यादव वताउँछन् । दुई पक्षबीच विवाद चर्किदै जाँदा झडपमा परी गंगीयाको मृत्यु भएको उनले वताए ।