नेकपा (दाहाल–नेपाल समुह) का अध्यक्ष माधवकुमार नेपालले प्रधानमन्त्री केपी शर्मा ओलीले बाटोमा कोही फेला पर्यो कि समातेर केन्द्रिय सदस्य बनाउन थालेको वताएका छन् । 

नेपाल बुद्धिजीवी संगठनले बिहीबार आयोजना गरेको ‘प्रतिनिधिसभा विघटन ः प्रतिगामी कदम’ विषयक अन्तरक्रियामा वोल्दै अध्यक्ष नेपालले यस्तो वताएका हुन् । ‘जबज आफैले छोडेका ओलीले अहिले कार्यकर्तालाई दिग्भ्रमित पार्ने काम गर्दै हुनुहुन्छ’ उनले भने–‘ओलीले बाटोमा कोही फेला प¥यो कि समातेर केन्द्रिय सदस्य बनाउने काम गरेका छन् ।’

अध्यक्ष नेपालले केपी ओलीलाई बहुमतले पार्टी अध्यक्षबाट हटाइसकेको छ । ओलीले काम गर्न नदिएको भन्ने विषय भ्रामक भएको पनि उनले वताए । ‘उहाँलाई मनपरी काम गर्दा पनि पुगेन । सारा शक्ति आफ्नो हातमा लिँदा पनि पुगेन । सत्ताको दुरुपयोग गर्दा पनि पुगेन भन्नुहुन्छ । उहाँले लोकतान्त्रिक परिपाटीलाई नै लत्याएर अघि बढ्न खोज्नुभयो’ उनले भने–‘उहाँले जथाभावी नियुक्ति गर्ने देखि लिएर गलत काम गर्दै हिँड्नु भयो । पदका निम्ति अयोग्यहरूलाई छानेर अघि बढ्नु भयो ।’

आफुहरु केपी ओलीको दास नभएको नेपालले वताए । ‘हामी केपी ओलीका दास होइनौं । हामीले पार्टीमा विधि पद्धतिका बारेमा छलफल गरौं भन्यौं’ उनले भने–‘नीतिगत र राष्ट्रिय सरोकारका विषयमा जनसरोकारका विषयमा छलफल गरौं भन्यौं । हामीले उहाँको हरेक कदममा साथ नदिनु नै हाम्रो अपराध हो र ?’

ओलीले तानाशाह र निरंकुश तरिका अपनाएकाले आफुले निसासिएर आवाज उठाएको उनको भनाई छ । ओलीको चिन्तन र कार्यशैलीमा नै समस्या देखिएको नेपालले आरोप लगाए । ‘उहाँको कार्यशैलीबाट पार्टीका नेता कार्यकर्तामात्रै होइन प्रतिपक्षी पनि पीडित भए’ उनले थपे–‘केपी ओलीले प्रधानमन्त्री पदको गरिमा राख्न सक्नु भएन । उहाँ सानो गुटमा रमाउनु भयो । आफ्नो भजन गाउनेहरूलाई मात्रै समातेर अघि बढ्नु भयो । हामीले उहाँलाई न्याकेका होइनौं ।’

ओलीले रातारात पार्टीको विधानविपरीत केन्द्रीय सदस्य थपेको नेपालले वताए । ‘विधान संशोधन गर्न दुई तिहाइ चाहिन्छ त्यो नभइ गरेको निर्णय कानुनतः हुँदैन । उहाँसित बहुमत नै छैन हामीसँग प्रस्ट बहुमत छ । तर उहाँले भ्रममा पार्ने काम गर्नुभएको छ’ नेपालले भने –‘उहाँ विधान मान्नुहुन्न बहुमत मान्नु हुन्न। उहाँ त आफ्नो निर्णय नै सर्वेसर्वा भन्नुहुन्छ । व्यवस्थामा सबैले बस्न सक्नुपर्छ ।’

संविधानको ‘कू’ गरेको बेला चुनावको औचित्य नै नहुने नेपालले वताए । ‘संविधानको कुनै धारामा प्रतिनिधिसभा विघटन गर्ने व्यवस्था गरिएको छैन । दुई वर्षसम्म अविश्वासको प्रस्ताव ल्याउन नमिल्ने प्रावधान पनि थियो । हुँदै नभएको धारा राखेर अनि अन्तर्राष्ट्रिय अभ्यास लगायतका कुराहरु राखेर उहाँले विघटन गरे भन्नुहुन्छ’ उनले भने–‘त्यसैले लोकतन्त्र र स्थायित्वमाथि प्रहार गर्ने काम जुन भएको छ यो असंवैधानिक कदम हो । यसका विरुद्ध डटेर सामना गर्नुपर्ने बेला आएको छ ।’

ओलीले अहिले पनि अनेकौं गलत काम गर्दै हिडेको उनले वताए । ‘अहिलेसम्म पार्टी सदस्य त हुनुहुन्छ अब उहाँको गतिविधि हेर्दा थप कारबाही गर्नुपर्ने देखिएको छ’ उनले चेतावनी दिदै भने–‘आज बस्ने स्थायी कमिटी बैठकले गम्भीर समीक्षा गरेर केही निर्णय गर्ने छ । अब ओलीले विश्राम लिनुपर्छ ।ओलीको बोझ यो देशले बोक्न सक्दैन ।’