प्रधानमन्त्री तथा नेकपा ओली समूहका अध्यक्ष केपी शर्मा ओलीले ‘भेट्नो कुहेर झरेका फलले रुखै मै हुँ भनेर दाबी गर्ने ?’ भन्दै पुस्पकमल दाहाल ‘प्रचण्ड’ र माधवकुमार नेपाललाई प्रश्न गरेका छन् ।

प्रधानमन्त्रीनिकट समूहको काठमाडौं जिल्ला कमिटीले आयोजना गरेको सभामा बोल्दै प्रधानमन्त्रीले यस्तो प्रश्न गरेका हुन् । उनले देशको कानुन र नियमावली अनुसार पार्टी चलाइरहेको बताए। ‘भेट्नो कुहिएर झरेका दुई वटा फलले रुखै मै हुँ भन्ने?’ प्रश्न गर्दै उनले भने–‘कार्की बैंक्वेटमा जानुभएछ । खानपिन गर्नुभयो होला ? केपी ओलीलाई निकालिदियौँ भनेर पत्र पठाएछन् । जसको कटेरो उसको पुच्छर बाहिर।’

‘निर्वाचन आयोगवाट हिजो एउटा पत्र हिजो प्राप्त गरेँ । उहाँहरुले एउटा निवेदन हाल्नुभएको रहेछ । यो बरमझियाको पेडा पसल हो ? पेरिसडाँडामा १५ जनाको पत्रकार सम्मेलन गर्नुभएको छ, यो असली पेडा पसल भनेर। सूर्य चिह्न हामीलाई दिनुस् भनेर’ उनले भने–‘जसको घर हो उ निवेदन हाल्न जान्छ ? जसको जमिन हो उ निवेदन हाल्न जान्छ ? जसको गाडी हो उ मेरो हो भनेर जानुपर्छ ? हामी निवेदन हालेर जानुपर्ने अवस्था छैन ।’ 

प्रधानमन्त्री ओलीले खिया लागेका दुई वटा नट र बल्टु फुक्लिनासाथ पार्टी गतिसाथ अघि बढेको भन्दै ब्यंग्य गरे।