जनकपुर- गोली हानी लुटपाट गरेको घट्नाका अभियुक्तलाई प्रहरीले ९ वर्षपछि पक्राउ गरेको छ ।
धनुषाको गणेशमान चारनाथ नगरपालिका–२ का ३४ वर्षीय जागेश्वर यादवलाई प्रहरीले पक्राउ गरेको हो ।

सिरहाको मिर्चैया नगरपालिका–३ स्थित सडक खण्डमा घुमफिर गरिरहेको अबस्थामा यादवलाई बुधबार पक्राउ गरिएको हो। 

सिरहाको तत्कालिन धनगढी गाविस–९ का श्रीप्रसाद साह सोनारलाई विसं २०६८ भदौ २७ गते घरबाट मोटरसाइकल चढी फुटबल खेल्न गएको वेला गोली हानी हत्या गरिएको घट्नाका उनी अभियुक्त हुन । सिरहाका डिएसपी शालिग्राम शर्माका अनुसार मृतकको साथबाट उनले धनमाल पनि लुटपाट गरेको जाहेरी परेको छ।

मृतक चढेको मोटरसाईकल, नगद २५ हजार रुपैया, सुनको औठी, सिक्री, मोबाईल, चाँदीको ब्रासलेट गरी करिव २ लाख ५८ हजार बराबरको सामान र कागज पत्र लुटेर भागेको उनी विरुद्ध जाहेरी परेको प्रहरीले जनाएको छ ।

घटनाको ९ वर्षपछि यादवलाई पक्राउ गरिएको सिरहा प्रहरीले जनाएको छ ।