कोरोना महामारीको रोकथाम तथा न्यूनीकरणका लागि भन्दै सरकारले गत चैत ११ देखि वन्द गरेको नाका विहिवारदेखि सरकारले सञ्चालन गर्ने निर्णय गरे पनि सबै नाकामा सर्वसाधारणले आवतजावत गर्न पाएका छैनन् । तर, प्रदेश १ का नाकाहरुबाट हुने आवागमन भने केहि खुकुलो बनाइएको छ ।

प्रदेश १ को विहार र पश्चिम बंगाल राज्यसँग सीमा जोडिएका नाका आवागमनमा खुकुलो बनाइएको हो । इलामको पशुपतिनगर, झापाको काँकडभिट्टा तथा खजुरगाछी, मोरङको रानीबाट अब कोभिड संकट व्यवस्थापन केन्द्र (सिसिएमसी)को वेबसाइटमा राखिएको अनलाइन फारम भरेर सीमा नाकाबाट आवागमन गर्न दिने ब्यवस्था मिलाइएको छ ।

मोरङका सहायक सिडिओ धुव्रबहादुर खड्काले नेपाल र भारतका आम नागरिकहरुले अति आवश्यक परेको खण्डमा कोभिड संकट व्यवस्थापन केन्द्र (सिसिएमसी) को वेबसाईटमा राखिएको अनलाईन फारम भरेर मात्र सीमा नाकाबाट आवागमन गर्न पाउने बताए ।

उनका अनुसार अनलाइन फर्म भरेपछि प्राप्त हुने बारकोडसहितको रसिद देखाएर सम्बन्धित भन्सारबाट आम नागरिकले आवागमन गर्न पाउने छन् ।

सरकारले सोही अनुसारको परिपत्र जिल्ला प्रशासन कार्यालयमा पठाएको खड्काले बताए । तर सामान्य अवस्थामा जस्तो किनमेल र घुमफिरकै लागी भने नाका नखोेलिएको जानकारी दिए ।

गृह मन्त्रालयले मन्त्रिपरिषद् निर्णयका आधारमा बिहीबार जिल्ला प्रशासन कार्यालयलाई नाका खुलाउन सर्कुलर पठाएको सहायक प्रजिअ खड्काले जानकारी दिए ।

दुई महिनायता हवाई सेवा सञ्चालनमा आइसकेपनि सीमा नाका बन्द थिए । भारततर्फका धेरै नाका बन्द हुँदा सीमाका नेपालीले घरायसी सामान खरिद, नातागोता भेटघाट र खेतीपातीका लागि समेत सहजै ओहोरदोहोर गर्न पाएका छैनन्। 

सरकारले बिहीबार भारत र चीन सीमाका थप १६ वटा नाका सञ्चालन गर्ने निर्णय गरेको थियो ।
लुम्बिनी प्रदेशका मुख्य गरी रूपन्देहीको बेलहिया र बाँकेको जमुनाह नाकाबाट यसअघि नै पैदल आउजाउ खोलिएको थियो । कपिलवस्तुका दुई नाका पनि सञ्चालनमा आएनन । कृष्णनगर र मर्यादपुर नाका खुलेको सार्वजनिक भएको थियो ।
पश्चिम नवलपरासीको भारतीय नाका अझै बन्द छ । महेशपुर मूल भन्सार र चारवटा छोटी भन्सार पनि शुक्रबार बन्द रहे ।

जिल्ला प्रशासन कार्यालय बाँकेले सीमा नाका खुला गरिएको आधिकारिक जानकारी नआएको जनाएको छ । बर्दियाका सिडिओ लीलाधर अधिकारीले यात्रुको आवागमनमा रोकतोक नहुने बताए । 
रूपन्देहीका सिडिओ पीताम्बर घिमिरेले सीमा क्षेत्रमा हेल्थ डेस्क राखेर भारतबाट नेपाल आउने व्यक्तिको स्वास्थ्य परीक्षण गरेर मात्र मुलुक प्रवेश दिइने बताए । 

धनुषाको जटही र इनर्वा नाका शुक्रबार बन्द रहे । गृह मन्त्रालयबाट पत्र नआएकाले नखोलिएको जिल्ला प्रशासन कार्यालय धनुषाले जनाएको छ। महोत्तरीको भिठ्ठामोड नाका पनि खुलेन । आवतजावत बन्द भए पनि भारतबाट मालसामान लिएर आउने गाडी भने आइरहेको सशस्त्र प्रहरीले जनाएको छ । सर्लाही सदरमुकाम मलंगवास्थित नेपाल–भारत नाका भारतीय पक्षको अवरोधका कारण सुचारु हुन सकेन ।

बाराको सिम्रौनगढ र मटिअर्वा नाका पनि खुलेका छैनन । पर्सामा यसपटक थप नाका खुला गरिएका छैनन । मुख्य नाका वीरगन्ज–रक्सौल भने यसअघि नै खोलिएको थियो । पर्सामा भिस्वा–सिकटा, धोरे–भेलाही, जानकीटोला–इनर्वा नाका पनि भारतसँग जोडिएका व्यस्त नाका हुन ।

सप्तरीको कुनौली नाकामा पनि आवागमन भएको छैन । रौतहटको गौर र बंकुल नाकामा भने झन्डै ११ महिनापछि शुक्रबारबाट आवागमन सहज बनेको छ । 

कञ्चनपुरका नाका खुलाउने सम्बन्धमा स्थानीय प्रशासन अलमलमै छ । बैतडीका सिडिओ मोहनराज जोशीले केन्द्रबाट परिपत्र नआएकाले झुलाघाट नाका नियमित सञ्चालनमा ल्याउन नसकेको बताए । दार्चुलाका सिडिओ शरदकुमार पोखरेलले यसअघि दिन बिराएर दैनिक एक घण्टा नाका खोलिँदै आए पनि पूर्ण रूपमा आउजाउ सञ्चालन गर्न भारतीय प्रशासनसँग समन्वय भइरहेको बताए ।
फोटोः सप्तरीको कुनौली नाका।