नेपाली कांग्रेसका नेता शेखर कोइरालाका दाजु निरञ्जन कोइरालाको कोरोना संक्रमणका कारण निधन भएको छ । 

भारतको नया दिल्लीमा बसोबास गर्दै आएका कोइराला विगत केही समयदेखि अस्वस्थ थिए । कोरोना संक्रमणपछि उनलाई म्याक्स अस्पतालमा भर्ना गरिएको थियो। एक महिनादेखि उपचार गराइरहेका उनको आइतवार विहान ११ बजे निधन भएको हो ।

पर्यटन व्यवसायीसमेत रहेका कोइराला केशव कोइराला र नोना कोइरालाका छोरा तथा कांग्रेस नेता शेखर कोइरालाका दाजु हुन् । 

दाजु बिरामी भएपछि १४ पुसमा शेखर कोइराला दिल्ली गएका थिए । उनको आजै अन्त्येष्टि गरिने बताइएको छ । उनले नेपालमा पञ्चायती शासनकाविरूद्ध प्रजातान्त्रिक आन्दोलनमा सक्रिय भूमिका निर्वाह गरेका थिए ।