सप्तरीमा डेढ महिनाभित्र करेन्ट लागेर दुई वटा जंगली हात्तीको मृत्यु भएको छ। शुक्रवार राती गहुँवारीमा लगाइएको करेन्ट लागेर एउटा जंगली हात्तीको मृत्यु भएपछि करेन्ट लागेर मर्ने हात्तीको संख्या २ पुगेको हो । 

खड्ग नगरपालिका–५ अमहामा गहुँवारीमा विद्युतीय तार लगाएर करेन्ट छोडिएको थियो । सुँडले तारमा छुँदा करेन्ट लागेर हात्तीको मृत्यु भएको डिभिजन वन कार्यालय राजविराजका प्रमुख सन्तोष झाले जानकारी दिए ।

यसअघि मंसिर ६ गते राती कञ्चनरूप नगरपालिका–५ पडेमारास्थित धानखेतमा भाले हात्ती मृत फेला परेको थियो । धान खान गाउँ पसेको भाले हात्तीको करेण्ट लागेर मृत्यु भएको स्थानीय बच्चुलाल चौधरीले बताए । 

उत्तर–दक्षिण गएको ११ केभीको विद्युत् प्रसारण लाइनको तारमा अल्झिएको अवस्थामा हात्ती मृत भेटिएको छ र बिजुलीको पोल ढलेको थियो ।

कोशी टप्पु वन्य जन्तु आरक्षबाट ३÷४ वटाको संख्यामा आएको हात्तीको समूहले धान खाएर नष्ट पारेको र उनीहरुमध्ये अन्दाजी ७० वर्षको बहिरो हात्तीको बिजुलीको करेण्ट लागेर मृत्यु भएको गाउँलेहरु बताउँछन् । 

दुर्घटनावस करेण्ट लागेर हात्तीको मृत्यु भएको देखिएको आरक्षका वार्डेन चन्द्रशेखर चौधरीले बताए । कम उचाईबाट बिजुलीको तार लगेको वा हात्तीले पोलमा धक्का दिदाँ करेन्ट लागेको उनको भनाई छ ।