गाउँमाथिबाट पहिरो खसेपछि १७० परिवार विस्थापित, सञ्चार सेवा अवरुद्धहुँदा थप सास्ति
बझाङको खप्तडछान्ना गाँउपालिकामा पहिरोमा पुरिएर चार जनाको मृत्यु भएको छ । पिठातोलामा २ जना बेपत्ता भएकाछन् । घरमाथिबाट पुरिँदा खप्तडछान्ना गाँउपालिकाको माझीगाँउ र कालुखेतीका दुई/दुई जनाको मृत्यु भएको हो ।
वडा नम्बर ४ माझिगाँउका अन्दाजी ४५ वर्षीय धर्मराज रोकाया र उनकी ४१ वर्षीया श्रीमतीको पहिरोमा पुरिएको मृत्यु भएको प्रहरीले जनाएको छ ।
यस्तै वडा नं ५ कालुखेतीमा अन्दाजी ४७ वर्षीय विरु गिरी र उनकी ४५ वर्षीया श्रीमती चन्द्रा गिरीको पनि पहिरोमा पुरिएर मृत्यु भएको छ ।
चारै जनाको पहिरोले घर भत्काएपछि च्यापिएर मृत्यु भएको खबर आएको र छान्ना प्रहरी चौकीबाट प्रहरी टोली घटनास्थलतर्फ खटाइएको जिल्ला प्रहरी कार्यालय बझाङका प्रमुख डीएसपी रुपक खडकाले जानकारी दिए ।
पहिरोमापरी ज्यान गुमाएका खप्तड छान्ना गाउँपालिका ४ धर्मराज रोकाया र उनकी धर्मपत्नि
सोमबार रातिको पहिरोमा परेर बझाङको थलारा गाउँपालिका–४ डिक्लामा २३ जना र खप्तडछान्नाका पिठातोलामा २ जनासहित २५ जना वेपत्ता भएका छन् । गाउँबाट एक किलोमिटर माथि रहेको ढोगदिना डाँडाबाट पहिरो खस्दा सात घर पहिरोमा पुरिएको र २५ जना वेपत्ता भएको प्रहरीले जनाएको छ ।
पहिरोमा पुरिएर गगने सार्कीको एकै परिवारका १८ जना र नरे पार्कीको परिवारका ६ जना छन् । गगने सार्की रोजगारीका लागि भारतमा छन् भने उनका माइला छोरा काले सार्की सम्पर्कमा छन् । पूरा गाउँ पहिरोको जोखिममा परेपछि डिक्लाका १७० भन्दा बढी परिवार विस्थापित भई आफन्त र नजिकैको विद्यालयमा बसिरहेका छन् ।
पहिरोका कारण तल्लो डिक्ला र माथिल्लो डिक्ला गाउँका स्थानीय त्रिभुवन मावि महेन्द्रधारमा अस्थायी रुपमा आश्रय लिएर वसेको जनाईएको छ ।
पहिरो खसिरहेका कारण उद्धार हुन सकेको छैन । आइतबार रातिबाट सुरु भएको अविरल वर्षाका कारण जिल्लाभर जनजीवन अस्तव्यस्त भएको छ । पहिरोले जयपृथ्वी नगरपालिका – १ पिमी गाउँमा मात्रै ६० परिवार विस्थापित भएको स्थानीयले बताएका छन् ।
वर्षासँगै सदरमुकाम नजिक भएर बग्ने डुङग्री खोलामा आएको बाढीले डुङग्री बजार र लेकी जोड्ने झोलुङगे पुल बगाएको छ । पुल नजिक रहेका ५ वटा पक्की घर पनि बगाएको र बजारका अरु घरहरु पनि जोखिममा परेको प्रहरीले जनाएको छ ।
वर्षा र पहिरोले सुदूरपश्चिमका धेरै पहाडी जिल्लामा सञ्चार सेवा अवरुद्ध भएको छ । बाढीले सडक अवरुद्ध भएको र नेटवर्क नहुँदा समयमै खबर नपाएकोले उद्वारमा समस्या भइरहेको जिल्ला प्रहरी कार्यालय बझाङका प्रमुख डिएसपी रुपक खड्काले बताए ।
पहिरोले जिल्ला जोड्ने जयपृथ्वी राजमार्ग लगायत जिल्लाभित्रका सबै ग्रामीण सडकहरु अवरुद्ध भएका छन् । ठाउँठाउँमा पोल ढलेका कारण जिल्लाभरको विद्युत सेवा अवरुद्ध छ । सदरमुकाम चैनपुर लगायत दर्जन बढी ठाँउको खानेपानी सेवा पनि अवरुद्ध भएको बताइएको छ ।
बेपत्ताको खोजिगर्न जिल्लास्थित सुरक्षा निकाय घटनास्थल तर्फ प्रस्थान
थलारा गाउँपालिका– ४ डिख्लामा पहिरोमा परी बेपत्ता भएका २३ जनाको खोजीकार्यका लागि नेपाली सेनाको हेलिकोप्टर घटनास्थलतर्फ उडेको छ । घटनास्थलमा प्रहरी र स्थानीयले पहिरोमा परी बेपत्ता भएकाहरूको खोजीकार्य जारी राखे पनि बेपत्ताहरूको अवस्था अझै अज्ञात रहेको जिल्ला प्रहरी कार्यालयका डिएसपी रूपक खड्काले बताए ।
‘नेपाली सेना, सशस्त्र प्रहरी र नेपाल प्रहरीको रेस्क्यु टोलीसहित नेपाली सेनाको हेलिकोप्टर घटनास्थल पुगी बेपत्ताहरूको खोजीकार्य भइरहेको छ ।’ डिएसपी रूपक खड्काले भने ।