चीनमा एक पटक नियन्त्रणमा आईसकेको कोरोना संक्रमण फेरी दोहोरिएको छ। कतिपय भागमा अहिले पनि कोरोनाभाइरस संक्रमण बढिरहेको छ । 

चीनभरिमा कोरोनाका २९ नयाँ केस फेला परेको मध्ये ६ वटा केस लान्चोमा शहरमा देखिएका छन् । उत्तरपश्चिमी प्रान्त गान्सुको राजधानी लान्चोको जनसंख्या ४० लाखभन्दा बढी छ । 

संक्रमण रोक्नका लागि सरकारले लान्चो शहमा लकडाउन लगाएको छ । अत्यन्तै जरूरी परे मात्र घरबाट बाहिर निस्कन मानिसहरूलाई सरकारले आदेश दिएको छ।

शहरमा मानिसहरूको आवागमनमा कडा निगरानी गरिने अधिकारीहरूले बताए । मानिसहरूलाई अत्यावश्यक सामान किन्न र औषधोपचार गर्नका लागि मात्र घरबाट निस्कन दिइनेछ । स्थानीय नागरिकहरूलाई एकअर्कासँग भेट्न प्रतिबन्ध लगाइएको छ । 

सोमवार इन्नर मंगोलियाको एजिन काउन्टीका मानिसलाई पनि घरैमा बस्न भनिएको छ । त्यहाँ गत साता १५० भन्दा बढी कोरोनाका केस भेटिएका थिए । 

चीनको राष्ट्रिय स्वास्थ्य आयोगले एक हप्तामा कोभिड संक्रमण ११ राज्यमा फैलिएको जनाएको छ । राजधानी बेइजिङमा मात्र कोरोना संक्रमितको संख्या २१ पुगेको छ ।