सरसफाईमा ध्यान नदिएको विरोधमा वडाध्यक्षले नै फ्याँके मेयरको घर अगाडि फोहोर
जनकपुर उपमहानगरपालिकाका मेयर लालकिशोर साहको निवास अगाडि वडाध्यक्षले नै फोहोर थुपारेर विरोध गरेका छन् । तीनवटा वडाका वडाध्यक्षले मेयरको निवास अगाडि फोहोर फ्याँकेर विरोध जनाएका हुन् ।
वडा नं ३ का अध्यक्ष जानकी रमण साह, वडा नं ४ का अध्यक्ष सुदर्शन सिंह र वडा नं ७ का अध्यक्ष दीपेन्द्र साहले आइतबार साहको निवास अगाडि नै फोहोर फ्याँके। केही दिनदेखि नै सहरमा थुप्रिरहेको फोहोर व्यवस्थापन नहुँदा स्थानीयले गुनासो गर्न थालेपछि उनीहरुले विरोध गर्न यो उपाय खोजेका हुन ।
ट्याक्टरमा फोहोर लिएर गएका उनीहरुले मेयरको निवास कलवार कुटी नजिकै लगेर फ्याँकिदिएका हुन् । जनकपुरमा तिहारका लागि घर र पसल सरसफाइ गरेपछि निस्किएको फोहोर केही दिनदेखि नै सडकमा असरल्ल हुँदा सहर नै दुर्गन्धित बनेको थियो । समयमै फोहोर व्यवस्थापन नहुँदा जनकपुरका हरेक टोल र चोकमा यतिबेला फोहोरको डंगुर छ।
वडाध्यक्षहरूले फोहोर व्यवस्थापनका लागि ट्याक्टर र सफाइकर्मी माग गरे पनि मेयरले उपलब्ध नगराउँदा उनीहरू थप आक्रोशित बनेका थिए ।
प्रमुख प्रशासकीय अधिकृत विनोद खड्काले वडाअध्यक्षहरूलाई भेट गरी अबको केही घण्टामै उपमहानगरले सहरमा थुप्रिएको फोहोर व्यवस्थापन गर्ने प्रतिवद्धता जनाएका छन् ।
