पूर्वराष्ट्रपति डा. रामवरण यादवले न्यायालयमा वढेको विवाद समाधान नहुँदै विदेश भ्रमणमा हिडेर प्रधानमन्त्री शेरवहादुर देउवाले देशकै वेईजत गरेको आरोप लगाएका छन् ।

‘विपी विचार, नीति र व्यवहार’ नामक पुस्तकको आइतबार काठमाडौंमा विमोचन गर्दै उनले प्रधानमन्त्री देउवाले गलत गरेको वताए । 

न्यायालय बेहाल अवस्थामा रहेका बेला प्रधानमन्त्री देउवाले बेलायत भ्रमणमा गएर शिर ठाडो पार्न नसक्ने बताए । यादवले भने –‘आज हाम्रो सम्माननीय प्रधानमन्त्री बेलायत जानुभएको छ । तर आज बेलायतको सामुन्ने संसारको सामुन्ने न्यायालयको यो अवस्था छ । के कसरी हामीले हामी संसारको सामुन्ने टाउको देखाउन सक्छौं ?’

सर्वोच्च अदालतका सबै न्यायाधीश, संविधानविद् कानुनविद र न्यायक्षेत्रका वुद्धिजीवि एकातिर हुँदा पनि प्रधानन्यायाधीशले छोड्दिन भन्नुको पछाडि कसको तागत छ भनी उनले प्रश्न गरे । 

न्यायपालिकामा सरकारले हस्तक्षेप गर्न नमिल्ने भए पनि न्यायालयमा देखिएको समस्या समाधान गर्न ट्रयाक टु डिप्लोमेसी अपनाउन सक्ने पूर्वराष्ट्रपति यादवको भनाई छ। 

प्रधानन्यायाधीशले सरकार र संवैधानिक निकायमा हिस्सा खोज्नु नेपालमा अहिलेसम्म नभएको घटना भएको उनले बताए । उनले राष्ट्रपति विद्यादेवी भण्डारीको भूमिकाप्रति असन्तुष्टि जनाएका छन् ।