राप्रपाका अध्यक्ष प्रकाशचन्द्र लोहनीले नेपालीहरूको एकताको लागि मुलुकमा राजसंस्था आवश्यक रहेको वताएका छन् । 

राप्रपाले नैतिकरूपमा राजसंस्थाको उपस्थिति नेपाल राष्ट्रको हितमा हुन्छ भन्ने ठहर गरेको वताएका उनले नेपालमा धार्मिक राज्यको माग नगरेको वताए । उनले भने–‘तर, नेपालको पहिचान एउटा हिन्दू र बुद्ध धर्मको मिश्रण हो । त्यो पहिचानलाई हामीले छोड्नु हुँदैन ।’

धर्म निरपेक्षता नेपालमा विदेशीहरूले लादेको वताउँदै उनले संसारमा धर्मनिरपेक्ष राष्ट्र भन्ने नै कहीँ नभएको दावी गरे । आफूलाई धर्मनिरपेक्ष भन्ने राष्ट्रहरू मिसन पठाएर, पैसा पठाएर धर्म परिवर्तन गर्न लागिरहेको उनको दावी छ। ‘यस्तालाई कसरी धर्म निरपेक्षता भन्नु ? यी कोही धर्म निरपेक्ष होइनन् । यी सबै आफ्नो धर्मसापेक्ष हुन्’– उनले भने।

राप्रपाले बुद्ध र हिन्दू धर्मको संगमस्थल नेपाललाई वैदिक सनातन हिन्दू राष्ट्रको रूपमा राख्नु पर्ने माग अघि सारेको अध्यक्ष लोहनीले वताएका छन् । 

जनताले नै बर्हिगमन गराएको राजसंस्थालाई फेरि जनताले स्वीकार्ने पनि उनको दावी छ। कुनै पनि संस्थाको आवश्यकता समाजको समुन्नति र समाजको रक्षाको लागि आवश्यक छ÷छैन ? भन्ने कुराले निर्धारण गर्ने वताएका उनले भारत, चिन जस्तो ठूला देशको बीचमा रहेको नेपालको राजसंस्थाले एउटा विशिष्टता देखाउँने वताए ।

मुलुकमा अहिले स्थापित राष्ट्रपतिको स्थानमा राजसंस्था राख्नुपर्ने उनको तर्क छ। ‘राष्ट्रपति एउटा दलको पनि, दलभित्र पनि एउटा गुटको जस्तो हुनुभयो । उहाँको अभिव्यक्तिले त्यहीं देखायो । त्यसले संरक्षण नै दिन सकेन । त्यसकारण राजसंस्था नैतिक शक्तिको रूपमा नेपालीहरूले मान्छन्’ उनी भन्छन्–‘यो जनताको हावाहुरीले लिएर आउँछ । त्यस्तो सम्भावना पनि छ । चार पाँच महिनाअघि देशभर यस्तो लहर पनि देखिएका थियो । हामी त्यो लहर फेरि ल्याउने प्रयास पनि गर्छाै । संसद्को आवाजबाट पनि आउन सक्छ । दुईमध्ये के हुन्छ, त्यो परिस्थितिले निर्धारण गर्छ ।’

प्रकाशचन्द्र लोहनी राजसंस्था