बझाङको छबिस पाथिभेरा गाउँपालिका वडानं ०७ स्थित मजखोरी माध्यामिक विद्यालयका प्रधानाध्यापक जनक बोहराले आफु असक्षम प्रधानाध्यापक भएको घोषणा गरेकाछन् । विद्यालयको प्रशासन सञ्चालन गर्न नसकेको भन्दै बोहराले आफुलाई असक्षम भएको स्विकार गरेकाछन् । शैक्षिक प्रशासन सञ्चालन गर्न नसकेको असक्षमता व्यक्त गर्दै बोहराले केही दिनभित्र राजिनामा दिने घोषणा समेत गरेकाछन् ।

बिहीबार नेपाल आजको स्थलगत रिपोटिङको क्रममा विद्यालय परिसरमा हिसाब किताब गर्नु छ भन्दै घाम तापेर बसेका असक्षम प्रधानाध्यापक बोहराले राजिनामा दिने घोषणा गरेकाहुन् । 

विद्यालयको शैक्षिक गुणस्तर कायम गर्न नसकेको, आर्थिक क्रियाकलाप पारदर्शी नगरेको, शिक्षक नियुक्ति गर्दा सेटिङ गरेको लगायतका आरोपहरुले शिक्षकको घेराबन्दिमा परेपछि बोहरा राजिनामा दिन तयार भएकाछन् । 

बोहरा प्रधानाध्यापक भएदेखि नै विद्यालयको सामाजिक परिक्षण नगरेको, विद्यालयमा आएको बजेटको चरम दुरुपयोग गरेको तथा शैक्षिक गुणस्तर कायम गर्न नसकेकोले शिक्षकहरुले त्यसको प्रतिरोध गरेको शिक्षक रामचन्द्र मण्डेलले बताए । 

जनक बोहरा प्रधानाध्यापक हुँदा खुलेआम विद्यालयको रकम अपचलन गरेको शिक्षक मण्डेलको भनाई छ । 'विद्यालयमा विनियोजित बजेटमा कागज मिलाएर पैसा खाएको देखियो । पुस्तकालयका लागि आएको ६ लाख ५० हजार बराबरको रकममा कागज मिलाएर खाएको देखिएपछि हामीले विल र किताबको हिसाब गछौँ भन्दा एक लाख फिर्ता गर्छु भनेकाछन् ।' उनले भने । 

'पुस्तकालय स्थापना गरेको २ वर्षसम्म सबै रकमको किताब ल्याए भनेका थिए । हामीले विल पेश गर्नुस भन्दा अटेरी गर्थे । बिहीबार सबै शिक्षकहरुले बाध्य बनाएपछि विल देखाउन त तयार भएनन् तर एक लाख फिर्ता गर्छु भनेकाछन् । एक लाख फिर्ता गर्छु भन्नुले प्रधानाध्यापक बोहराले रकम दुरुपयोग गरेको पुष्टि गर्छ ।' शिक्षक मण्डेलको भनाई  छ ।
प्रधानाध्यापक बोहराले पुस्तकालय स्थापना गर्दा, आइटी ल्याव स्थापना गर्दा, विद्यालय भवन निर्माण गर्दा आर्थिक अनियमितता गरेको शिक्षकहरुको आरोप छ । 
आइटी ल्याव स्थापना गर्दा ल्याएको प्रिन्टरले एक पटक पनि काम नै नगरेको शिक्षक गोविन्द धामीले बताए । 
गत आर्थिक वर्ष निर्माण भएको ४२ लाख बराबरको विद्यालय भवनको काम अझै पुरा भएको छैन । प्रदेश सरकारको सामाजिक विकास शाखाबाट कागजात पेश गरेर रकम भुक्तानी लिइसकेपनि विद्यालयमा काम भने सम्पन्न भएको छैन । 

करिब एक लाख ५० हजारको फर्निचरको विल पेश गरेर गत असारमा भुक्तानी लिएपनि मंसिरसम्म विद्यालयमा फर्निचर भने एउटा पनि छैन । दुइ तला भएको विद्यालय भवनको सिढीमा समेत प्लास्टर गरिएको छैन । 

प्रधानाध्यापक बोहरालाई नेपाल आजले तपाइले पुस्तकालयको पैँसा अपचलन गरेको हो? भनेर प्रश्न गर्दा एक लाख विद्यालयलाई फिर्ता गरेको बताए । तर विल भरपाई के छ भन्ने प्रश्नमा भने उनले विल देखाउन नसकिने प्रतिक्रिया दिए । 

विद्यालयमा भुक्तानी भएको रकम बराबरको काम नभएको जानकारी नेपाल आजले जिल्लास्थित सामाजिक विकास शाखालाई गराएपछि तत्काल फर्निचरको व्यवस्थापन गर्न र सिढीमा प्लास्टर गर्न प्रधानाध्यापक बोहरालाई ताकेता गरेको छ । 
 

प्रधानाध्यापक राजिनामा