सियरा लिओनमा इन्धन बोकेको ट्यांकर दुर्घटना हुँदा भएको आगलागीमा परेर मृत्यु हुनेको संख्या १०८ पुगेको छ । सो दुर्घटनामा परेर अरु ९२ जना जलेर घाइते भएका छन् ।

घाइते भएकाहरुमध्ये अधिकांशको अवस्था गम्भीर छ । उनीहरुको शरीर जलेको बताइएको छ । पराष्ट्रपति मोहम्मद जुल्डेह जाल्लोहले १०८ जनाको मृत्यु भएको र अस्पतालमा अरु करिब ९० जनाको उपचार भइरहेको पनि जानकारी दिए । 

उपचार भइरहेकामध्ये अधिकांशको शरीरका धेरै भाग जलेका छन् । चिकित्सकहरुले दिएको जानकारीमा घाइते हुनेमा महिला र बालबालिका पनि छन् । तीमध्ये कतिपय दुर्घटनास्थलका स्थानीय छन् भने अरु केही सडकमा यात्रा गरिरहेका व्यक्ति पनि परेका छन् । 

सियरा लियोनको राजधानी फ्रिटाउनमा शुक्रबार साँझतिर दुर्घटनामा भएको थियो । इन्धन बोकेको ट्यांकर अर्को एउटा सवारी साधनसँग ठोक्किएपछि इन्धन पोखिएको थियो । पोखिएको सो इन्धन उठाएर लैजान स्थानीय व्यक्तिहरुबीच निकै भिडभाड भएको थियो ।

त्यस्तै यी दुई सवारी साधन ठोक्किएपछि त्यस समयमा सडकमा पनि मानिसहरु हिँडेका र केही भने आफ्नै सवारी साधनमा रहेका थिए । उनीहरु पनि सो दुर्घटनामा परेका थिए । उनीहरुलाई नै पछि आगोले छोएको थियो ।

आगलागी भएको र ठूलो मानवीय क्षति भएको प्रत्यक्षदर्शीले बताएका छन् । दुर्घटनालगत्तै घटनास्थलमा धेरै मानिस जलिरहेको देखिएको थियो  । घाइते र मृतकमध्ये धेरै दुर्घटनाका बेला घटनास्थलमा रहेका मोटरसाइकल चालक, पैदलयात्री, सडकका व्यापारीलगायत रहेको पनि उनीहरुले जनाएका छन् । 

पोखिएको सोही इन्धनमा आगो सल्किएकाले आगोले नजिक रहेका मानिसहरू र सवारी साधन जलेका थिए ।  राष्ट्रपति जुलियस मादा बायोले देशमा निकै ठूलो मानवीय क्षति भएको बताएका छन् । यस दुर्घटनाले आफूलाई अति दुखित बनाएको उनले बताएका छन ।