विगतमा एमालेले गरेको संसद अवरोध संविधान सम्मत छैनः सभामुख सापकोटा
सभामुख अग्निप्रसाद सापकोटाले विगतमा नेकपा एमालेले गरेको संसद अवरोध संविधान सम्मत नभएको वताएका छन् । सोमबार नयाँ बानेश्वरस्थित संघीय संसद भवनको अवलोकन गर्दै सभामुख सापकोटाले यस्तो वताएका हुन ।
एमालेले गरेको संसद अवरोध संविधान र नियमसम्मत् नभएको उनले जिकिर गरे। आफूले नेपालको संविधान र प्रतिनिधिसभाको नियमावलीमा टेकेर तटस्थ र निष्पक्ष भूमिका निर्वाह गरिरहेको पनि उनले दावी गरे।
‘उहाँहरुले जे गरिराख्नुभएको छ त्यो संविधान, नियम, कानूनअनुसार छैन। नेपाली जनताले यसलाई छर्लङ्ग बुझेका छन्’ उनले भने–‘जहाँसम्म मेरो सवाल छ, मैले तटस्थ, निष्पक्ष, स्वतन्त्र रुपमै गरेको छु र अझ मैले भन्नु पर्दा मैले नेपालको संविधान र प्रतिनिधिसभाको नियमावलीमा टेकेर नै सबै कुरा गरेको छु र सधै भरी त्यही गर्न म प्रतिवद्ध छु।’
नेकपा एमालेको केन्द्रीय कमिटीको बैठकले माधवकुमार नेपालसहितका सांसदलाई पार्टीबाट निष्कासनको कारबाही गरे पनि सभामुखले मान्यता दिएका थिएनन् । त्यसैले अघिल्लो अधिवेशनमा एमालेले सभामुखको भूमिका निष्पक्ष नभएको भन्दै संसद बैठक अवरुद्ध गरेको थियो ।
एनमाले सौराहामा सम्पन्न महाधिवेशनपछि अध्यक्ष ओलीले संसदको अवरोध जारी नै रहने वताएका छन् । तर, सभामुख सापकोटाले भने संसद सुचारु गराउने राजनीतिक सहमतिको प्रयास गरिने वताए ।
