‘नेतृत्व परिवर्तन’ भन्दै हिडेका प्रकाशमान अन्तिमा देउवाकै सरणमा
नेपाली कांग्रेसको जारी महाधिवेशनमा नयाँ ट्वीस्ट आएको छ। नेता प्रकाशमान सिंहले सभापति पदको दोस्रो चरणको निर्वाचनमा शेरबहादुर देउवालाई समर्थन गर्ने भएका छन् ।
देउवासँगको भेटपछि नेता प्रकाशमानले देउवालाई नै समर्थन गर्ने जानकारी दिएका हुन् । पत्रकारहरूसँगको कुराकानीमा उनले ‘हामीले दोस्रो चरणको निर्वाचनमा देउवाजीलाई सहयोग गरेर जाने निर्णय गरेका छौं’ भने।
नेतृत्व परिवर्तन गर्नुपर्छ भनेर प्रतिस्पर्धामा उत्रिएको र देशभरीका बहुमत महाधिवेशन प्रतिनिधिले देउवाको पक्षमा मत जाहेर गरेकाले आफुले पनि उनलाई नै सहयोग गर्ने निर्णय गरकेो उनले वताए । ‘विधान संशोधन र पार्टीमा भइरहेका कमिकमजोरी सच्याउने प्रतिवद्धता जाहेर गर्नुभएको छ । पार्टीभित्र सुधार ल्याउन र देउवाले कार्यशैली परिवर्तन गर्नुपर्नेछ’– उनले भने।
दोस्रो चरणको चुनावमा शेरबहादुर देउवा र शेखर कोइरालाबीच प्रतिस्पर्धा हुने छ । सिंहले देउवालाई समर्थन गर्ने निर्णय गरेकाले देउवा सभापतिमा निर्वाचित हुने लगभग पक्का भएको छ । पहिलो चरणको चुनावमा देउवाले २२५८ र कोइरालाले १७०२ मत पाएका थिए ।
३७१ मत पाएर तेस्रो स्थानमा रहेका प्रकाशमान सिंह, २५० मत पाएर चौथो स्थानमा विमलेन्द्र निधि र पाँचौ स्थानमा रहेका कल्याण गुरुङ सभापति पदको दोस्रो चरणको निर्वाचनबाट आउट भएका छन् ।
