बलिउडकी चर्चित गायिका असीस कौर काठमाण्डौंमा हुने ‘राता लम्बिया नाइट विथ असीस कौर’ कन्सर्टमा सहभागि हुन नेपाल आउन लागेकी छिन् । उनी ७ जनवरीमा नेपाल आउनेछिन् । 

जनवरी ८ मा दरबारमार्ग स्थित क्लब प्लेटिनम फेलिज इन्टरनेशनल इभेन्टले कन्सर्ट आयोजना गर्न लागेको हो । नेपाली दर्शकको बलिउड सेलिब्रेटी भेट्ने र सँगै नाच्ने चाहना पुरा गर्न कार्यक्रम आयोजना गर्न लागेको आयोजक संस्थाले जनाएका छन् ।

कार्यक्रममा आसीस कौरका वाहेक नेपाली गायक याबेश थापाले समेत प्रस्तुति गर्नेछन् । 

कौरको पछिल्लो समय ‘राता लम्बिया’ गीत निकै हिट रहेको छ । कौरले इन्डियन आइडल, आवाज पञ्जाब दी लगायतका विभिन्न गायन रियालिटी शोमा भाग लिएकी थिइन् । सन् २०२० मा खुदा हाफिज फिल्मको ‘जान बन गए’ बोलको गीतले उनलाई चर्चा दिलाएको थियो ।

पाँच वर्षको हुँदादेखि नै गायन क्षेत्रमा लागेकी कौरले ‘तमाचे’ फिल्मको ‘दिलदारा रिप्राइज’ मार्फत् बलिउडमा डेब्यू गरेकी थिइन् ।

केसरी फिल्मको ‘भे माही’, ड्राइभ फिल्मको ‘मखना’, सिम्बा फिल्मका दुई गीत ‘बन्देया रे बन्देया’ र ‘तेरे बिन’, लभयात्री फिल्मको ‘आख लड जावे’, ‘छोगडा’ र कपुर्स एण्ड सन्स फिल्मको ‘बोल्ना’ गीतमा उनले आफ्नो स्वर दिएकी छिन् ।