प्रचण्डको प्रतिवेदन १९औँ शताब्दीमै अल्झिएको मिलन पाण्डेको टिप्पणी
विवेकशील साझा पार्टीका संयोजक मिलन पाण्डेले नेकपा माओवादी केन्द्रका अध्यक्ष पुस्पकमल दाहाल ‘प्रचण्ड’ ले काठमाडौंमा जारी ८ औं महाधिवेशनमा प्रस्तुत गरेको राजनीतिक प्रतिवेदन १९औँ शताब्दीमै अल्झिएको टिप्पणी गरेका छन ।
उनले प्रचण्डको प्रतिवेदनमाथि ट्वीटरमा टिप्पणी गर्दै लेखेका छन्–‘प्रचण्डद्वारा प्रस्तुत दस्ताबेज सरसर्ती पढेँ। विगत छ, पुरानै विश्लेषण छ तर भविष्य देखाउन दस्ताबेज असफल भएको छ। नयाँ पुस्तालाई प्रतिनिधित्व गर्ने र आशा जगाउने विचार छैन।’
पाण्डेले उद्यमशील समाज निर्माण गर्न पार्टीका नेता–कार्यकर्ताले उत्पादनमा खट्ने भन्ने कार्यक्रम लागु गर्न सके राम्रो हुने प्रतिक्रिया दिएका छन् ।
उनले अगाडि भनेका छन्–‘विज्ञान भनेकै गतिको नियम हो भन्ने बुझाइमै हामी अल्झियौँ। विज्ञान कहाँ पुगिसक्यो, हामी चालको नियममै अल्झिएका छौँ। प्रचण्डजीको दस्ताबेज पनि १९औँ शताब्दीमै अल्झिएको छ ।’
उनले प्रचण्डले ३५ वर्ष पार्टी हाँकी सकेको र अव अभिभावक भएर बस्नुपर्ने सुझाव दिएका छन् । ‘त्यसमै उहाँको र उहाँको पार्टीको भलाइ देखिन्छ।’– उनले लेखेका छन् ।
