झापामा सामुदायिक वनमा घाँस काट्न गएकी एक महिलाको जंगली हात्तीको आक्रमणमा परी सोमवार मृत्यु भएको छ ।

कमलधाप राम पोखरी सामुदायिक वनमा साथीसँग घाँस काट्न गएकी भद्रपुर नगरपालिका–२, गौरीशङ्करकी ५० वर्षीया सीता दाहालको हात्तीको आक्रामणमा परी मृत्यु भएको हो । 

हात्तीको आक्रमणबाट उनको घटनास्थलमै मृत्यु भएको प्रहरीले जनाएको छ। कानुनी प्रक्रिया पूरा गरी शव पोस्टमार्टमका लागि मेची प्रादेशिक अस्पताल पठाईएको छ। 

जलथलको चारकोशे जंगलबाट निस्किने जंगली हात्तीले केही दिनदेखि त्यस क्षेत्रमा आतङ्क मच्चाउँदै आएका छन्। हात्तीले दर्जर्नौं घर भत्काइसकेको स्थानीयले बताएका छन्।