मोरङको मिक्लाजुङ गाउँपालिकाका शिक्षक राजेन्द्र श्रेष्ठको हत्यामा संलग्न भएको आरोप लागेका विप्लव नेतृत्वको नेकपाका मोरङ इन्चार्ज डीबी सिलवाल भनिने धनबहादुर विक अर्कै मुद्दामा कारागार चलान भएका छन् । उनलाई हातहतियार तथा खरखजना मुद्दामा पूर्पक्षका लागि कारागार चलान गरिएको छ ।

हतियारसहित बुढीगंगा गाउँपालिका– ४ बाट माघ ७ गते उनी पक्राउ परेका थिए । जिल्ला अदालत मोरङकी न्यायाधीश दुर्गा खड्काको इजलासले आइतबार हातहतियार तथा खरखजना मुद्दामा कारागार चलानको आदेश दिएपछि उनी कारागार चलान भएका हुन् । सोमबार दर्ता भएको अपहरण र कर्तब्य ज्यान मुद्दामा आइतबार बयान लिने अदालतको तयारी छ ।

संखुवासभाको मादी नगरपालिका–४ ओखरबोटे घर भएका विक व्यापारीसँग चन्दा लिन जाँदै गरेको अवस्थामा पक्राउ परेका थिए । को २४ प ४००५ नम्बरको मोटरसाइकलमा सवार रहेका विकको साथबाट एउटा सेमि अटोमेटिक पेस्तोल, तीन राउण्ड गोली, म्यागजिन, विभिन्न मोबाइलहरु, सिमकार्ड, सवारी चालक अनुमति पत्र बरामद भएको थियो ।

पक्राउ पछि सोधपुछ गर्दा मिक्लाजुङ गाउँपालिका–१ का शिक्षक राजेन्द्रकुमार श्रेष्ठको अपहरणपछि हत्या गरिएको घटनामा पनि उनको संलग्नता देखिएको प्रहरीको दाबी छ । विकविरुद्ध प्रहरीले हातहतियार खरखजना, अपहरण र कर्तव्य ज्यानसम्बन्धी छुट्टा छुट्टै मुद्दा दर्ता गराएको छ ।

सोमबार अपहरण र कर्तव्य ज्यान मुद्दामा उनीसहित ३५ जना विरुद्ध मुद्दा दर्ता भएको थियो । विप्लव समूहका महासचिव नेत्रबिक्रम चन्द, प्रवक्ता खड्गबहादुर विश्वकर्मा ‘प्रकाण्ड’सहित ३५ जनाविरुद्ध मुद्दा दर्ता भएको थियो ।

सुराकीको आरोप लगाउँदै घरबाटै नियन्त्रणमा लिएर अपहरणपछि ‘विप्लव’ समूहले शिक्षक श्रेष्ठको गत मंसिर २३ गते हत्या गरेको थियो ।

विप्लव जिल्ला अदालत मोरङ मुद्दा शिक्षक हत्या अपहरणपछि हत्या