प्रधानमन्त्री केपी शर्मा ओली नेतृत्वको नेकपाका नेता महेश बस्नेतले सर्वोच्च अदालतको फैसलाको सम्मान गर्नुपर्ने बताउँदै तर, फैसला पछि मुलुक राजनीतिक अस्थिरता तर्फ जाने सम्भावना बढेको बताएका छन् । 

राजनीतिक अस्थिरताले नयाँ–नयाँ समीकरण बन्ने र भत्कने दिशातिर जाने सम्भावना बढेको वताएका उनले नेताहरुले सुझबुझपूर्ण ढंगले फैसला गर्नुपर्ने वताए ।

विभाजित नेकपालाई एकता गराउनेतिर लाग्नु राम्रो हुने पनि उनले बताए । संसद् पुनर्स्थापनाले नेपाली कांग्रेस र जनता समाजवादी पार्टीको हातमा राजनीतिक खेल भएको उनको भनाइ छ । तर, २०५२ देखि ०६२ सम्मको राजनीतिक विकृति दोहोरिन दिन नहुने बस्नेतले बताए । 

‘०५२ सालको मनमोहन अधिकारीको सरकारको संसद विघठन गरी निर्वाचनमा गएको प्रक्रिया विघठन गरेको फैसलाले राजनीति १ दशकसम्म अस्थिरता र विकृतीतर्फ फसेको थियो,’ सामाजिक सञ्जालमा बस्नेतले लेखेका छन् ।

अझै पनि राजनीति ओलीके वरिपरी घुम्ने बस्नेतको दाबी छ । उनले ओलीलाई सुझबुझपूर्ण कदम चाल्न पनि सुझाव दिएका छन् । उनले भनेका छन्–‘विभाजनकारीहरूलाई एकताको प्रक्रियामा फर्काउनुस् । पद, पैसा र प्रतिष्ठाका लागि मरिहत्ते गर्नेलाई सदाचारको बाटोमा हिडाउनुहोस् । राजनीतिलाई विकृती र विसंगती मुक्त बनाउनुहोस् । हामी सबैको सशक्त र दरो समर्थन तपाईंलाई रहनेछ ।’

ओलीको प्रतिनिधिसभा विघटन गर्ने पुस ५ को सिफारिसको आधारमा राष्ट्रपति विद्यादेवी भण्डारीको घोषणालाई सर्वोच्च अदालतले मंगलबार असंवैधानिक ठहर गर्दै बदर गरेको छ । अब प्रतिनिधिसभा बैठक १३ दिनभित्र अर्थात् फागुन २४ गतेभित्र बोलाउन पनि परमादेश दिएको छ । 

प्रधानमन्त्री केपी शर्मा ओली अदालतको फैसलाको सम्मान विभाजित नेकपा नयाँ–नयाँ समीकरण