प्रधानमन्त्री ओलीलाई तुरुन्त राजीनामा दिन वामदेवको सुझाव
सर्वोच्च अदालतले प्रतिनिधि सभा पुनःस्थापना गरेपछि नेकपाका उपाध्यक्ष वामदेव गौतमले प्रधानमन्त्री केपी शर्मा ओलीलाई प्रधानमन्त्री पदबाट राजिनामा दिन सुझाव दिएका छन् । गौतमले एक विज्ञप्ति जारी गर्दै ढिला नगरी तुरुन्त राजीनामा दिन ओलीलाई सुझाव दिएका हुन् ।
उपाध्यक्ष गौतमले संवैधानिक इजलासको निर्णयलाई स्वागत गर्दै सम्माननीय राष्ट्रपतिले प्रेस विज्ञप्ति मार्फत प्रतिनिधि सभा अधिवेशन आह्वान गर्न पनि माग गरेका छन्। नेकपा उपाध्यक्षको हैसियतले अध्यक्ष केपी शर्मा ओली र प्रचण्डसँग तुरुन्तै सचिवालय बैठक वोलाउन पनि गौतमले आग्रह गरेका छन्।
प्रधानमन्त्री ओलीले गत पुस ५ गते प्रतिनिधि सभा विघटन गरेका थिए । सर्वोच्च अदालतको संवैधानीक इजलासले त्यसलाई असंवैधानिक ठहर गर्दै संसद पुनःस्थापनाको आदेश दिएको छ । गौतमले पनि अदालतको निर्णयलाई ऐतिहासिक भएको वताएका छन् ।
निरंकुशता स्वेच्छाचारिता, अराजकता र दुराचारिताको पराजय तथा संविधान, कानुन, लोकतन्त्र र जनताको सार्वभौमिकताले पुनर्विजय प्राप्त गरेको दिनका रुपमा उनले ब्याख्या गरेका छन् ।
उनले प्रधान न्यायाधीश र संवैधानिक इजलासका न्यायाधीशहरूप्रति आभार ब्यक्त गरेका छन् ।
सर्वोच्च अदालत वामदेव गौतम राजिनामा अधिवेशन आह्वान
