कोरोना संक्रमणको असरलाई मध्यनजगर गरी भारतको नयाँदिल्ली सरकारले आठ कक्षासम्मका विद्यार्थीहरुको लिखित परीक्षा नलिने निर्णय गरेको छ ।

कोरोना संक्रमणको महामारीका कारण भौतिक उपस्थितिमा पढाइ हुन नसकेकाले शिशु कक्षादेखि दुई कक्षासम्म सबै विद्यार्थीहरुलाई माथिल्लो कक्षामा सीधै भर्ना गरिने छ ।

यसैगरी, कक्षा तीनदेखि आठसम्मका विद्यार्थीहरुको लिखित परीक्षालाई असाइन्मेन्ट र प्रोजेक्ट वर्कबाट मुल्यांकन गरिने छ। यसैको आधारमा प्राप्ताङ्क र ग्रेड निर्धारण गरी विद्यार्थीहरुलाई उत्तीर्ण गराइने दिल्ली सरकारले जनाएको छ ।

‘कक्षा आठसम्म सबै बालबालिकाहरुलाई नो डिटेन्सन पोलिसीअनुसार उत्तीर्ण गराइने छ । तर यो वर्ष बालबालिकाहरुले सेमी अनलाइन क्लासमा के सिके भनेर बुझ्न जरुरी छ ताकि आगामी शैक्षिक सत्रमा राम्रो तयारी गर्न सकियोस् । त्यसैले हामीले यो वर्ष कक्षा आठसम्मका विद्यार्थीहरुलाई लिखित परीक्षाको सट्टा वर्षभरि वर्कसिट र असाइनमेन्टको आधारमा मूल्यांकन गर्दैछौं’– दिल्लीका उपमुख्यमन्त्री एवम् शिक्षामन्त्री मनिष सिसोदियाले भनेका छन्।

दिल्ली सरकारले आगामी शैक्षिक सत्रमा बालबालिकाहरुका लागि ‘देशभक्ति पाठ्यक्रम’ ल्याउने घोषणासमेत शिक्षामन्त्री सिसोदियाले गरेका छन् । 

कोरोना संक्रमण विद्यार्थी दिल्ली सरकार कक्षासम्म लिखित परीक्षा नलिने