प्रचण्ड–माधव नेतृत्वको नेकपाका नेता योगेश भट्टराईले प्रधानमन्त्री केपी शर्मा ओलीको साथमा रहेका सर्वोच्च अदालतमा बहस गर्ने वकिलदेखि उनको कदमलाई साथ दिने सबै मण्डले रहेको आरोप लगाएका छन् ।

पूर्वी नवलपरासीको कावासोतीमा शनिबार आयोजित प्रशिक्षण कार्यक्रमलाई सम्वोधन गर्दै भट्टराईले यस्तो वताएका हुन । ‘मण्डले र गणतन्त्रविरोधी झुण्डमा बसेर उनले संविधानमा व्यवस्थै नभएको धारा भनेर निर्वाचित प्रतिनिधिसभा भंग गरे’, उनले भने, ‘जनअधिकार खोस्ने नालायक र तानाशाहका रुपमा उनी इतिहासमा रहनेछन् ।’

प्रधानमन्त्री ओली नेपालका यसअघिका ४० जना प्रधानमन्त्रीभन्दा नालायक र जनअधिकार खोस्ने तानाशाहका रुपमा उदाएको उनले बताए । निर्वाचित जनप्रतिनिधिलाई काम गर्न नदिएर उनले ‘म नै राज्य हुँ’ भन्ने मान्यता बोकेका कारण ओलीलाई सबैले छोड्दै गएको उनको टिप्पणी छ।

पूर्वराजा ज्ञानेन्द्र शाह र प्रधानमन्त्री ओली अध्यक्ष रहेको पार्टी बन्यो भने आश्चर्य नहुने पनि उनले बताए। ओलीका सवै कदन गणतन्त्र र संघीयता विरोधी रहेको वताएका उनले भने–‘दुबै जना अध्यक्ष रहेको पार्टी बन्यो भने आश्चर्य हुने छैन । ओलीका सबै कदम त्यतातर्फ उन्मुख छन् ।’