भारतको विहारमा नेपाली मुलकी एक वालिकाको सामुहिक वलात्कारपछि हत्या गरिएको छ । 

विहारको पूर्वी चम्पारण जिल्लामा १२ वर्षीया बालिकाको बलात्कारपछि हत्या भएको हो । उनी नेपालको बार्दिया स्थित बारबर्दिया नगरपालिकाका दिपक (नाम परिवर्तित) की छोरी हुन् । दिपक परिवारसहित विगत आधा दशक देखि मजदुरीका लागि मोतिहारीको कुंडवजा चैनपुरमा बस्दै आएका छन् । 

घटना हुँदा दिपक मजदुरीमा गएको, श्रीमती नेपाल आएको र छोरा बजार गएको पाईएको छ ।

साँझ करिब ४ बजे छोरा डेरामा फर्किंर्दै गर्दा घरबेटी सियाराम साहले उनका छोरालाई रोक्न खोजे । तर घरबेटीको कुरा नकार्दै घर पुगेका उनले बहिनी घाइते भएर लडिरहेको देखे । त्यसपश्चात उनले तुरुन्तै बुबालाई बोलाए र उपचारका लागि स्थानिय चिकित्सककहाँ लगियो । तर त्यहाँ कसैले पनि आफ्नो छोरीको उपचार गर्न नमानेको दिपकले बताए । 

हत्या गरिएकी वालिकाको शव नुन चिनी छर्केर जलाईएको छ । यस विषयमा भाइरल भएको एउटा भिडियोले यो घटनामा स्थानीय प्रहरीचौकीका थानाध्यक्षको हात भएको संकेत गरेको छ । भिडियोमा अभियुक्त रमेश शाहले ‘केटीको चिसोले निधन भएको लेखिदिएर मिलाइदिनुस्’ भन्दै थानाध्यक्ष सञ्जीव कुमारलाई भनेको सुनिएको छ ।

देवेन्द्रकुमार साह नामका व्यक्तिले यदि शव चाँडै नजलाए दिपक र उनको छोरालाई पनि मारेर फ्याँकिदिने धम्की दिए । र जबरजस्ती खाली कागजमा ल्याप्चे लगाउन लगाए । त्यसपछि रातको १२ बजे नुन र चिनी छर्केर शव जनाईएको दिपकले जानकारी दिए ।