प्रधानमन्त्री केपी शर्मा ओली राष्ट्रपति विद्यादेवी भण्डारीलाई भेट्न शितलनिवास पुगेका छन्। निर्वाचन कार्यालय पुगेर निर्वाचनको तयारी जारी राख्न निर्देशन दिएलगत्तै प्रधानमन्त्री ओली शितलनिवास पुगेका हुन्। 

राष्ट्रपति भण्डारी र प्रधानमन्त्री ओलीबीच करिब आधा घण्टादेखि भेटवार्ता चलिरहेको जनाईएको छ । 

यसअघि प्रधानमन्त्री ओलीले निर्वाचन आयोग पुगेर चुनाव तयारी निरन्तर अघि बढाउन आग्रह गरेका छन्। निर्वाचन तयारीबारे छलफल गर्न आयोग पुगेका प्रधानमन्त्री ओलीले पदाधिकारीहरूलाई आफ्नो काममा निरन्तर लाग्न आग्रह गरेका हुन्।

निर्वाचन आयुक्त दिनेश थपलियाले चुनाव गर्न भइरहेको तयारीबारे प्रधानमन्त्रीलाई जानकारी गराएका थिए । प्रधानमन्त्रीका प्रेस सल्लाहकार सूर्य थापाका अनुसार आयोगका पदाधिकारीहरूलाई यससम्बन्धी काम निरन्तर अघि बढाउन सुझाव दिइएको छ ।

विशेषगरी निर्वाचनको सुरक्षा तयारी र बजेटबारे प्रधानमन्त्रीलाई जानकारी गराएको थापाको भनाई थियो।