नेकपा (माओवादी केन्द्र)का नेता मातृकाप्रसाद यादवले नेपाली कांग्रेस जसपालाई प्रधानमन्त्री दिन तयार भए आफुहरु पनि तयार रहेको वताएका छन् । प्रतिगमनकारी प्रधानमन्त्री केपी शर्मा ओलीलाई हटाउन आफ्नो पार्टी कांग्रेस र जनता समाजवादी पार्टीसँग सहकार्य गर्न तयार रहेको उनको भनाई छ ।

प्रेस संगठन नेपाल सप्तरीले सदरमुकाम राजविराजमा शनिबार आयोजना गरेको पत्रकार सम्मेलनमा नेता यादवले माओवादीले कांग्रेस र जसपासँग मिलेर सरकार वनाउने तयारी गरेको वताए ।

यो सरकार बनेपछि जसपाले राख्दै आएको रेशम चौधरीको रिहाइ, संविधान संशोधन लगायतका कामलाई अगाडि बढाइने उनले बताए । उनले भने–‘सरकार बनेपछि रेशम चौधरीको रिहाइ हुन्छ । संविधान संशोधनका लागि दुई तिहाइ बहुमत चाहिएकाले त्यसका लागि पनि प्रयास सुरु हुन्छ।’

नेता यादवले केपी ओलीसँग नमिल्न पनि जसपाका नेतालाई आग्रह गरे । 

प्रधानमन्त्री ओलीलाई ‘महाठग’को संज्ञा दिंदै नेता यादवले ओलीले विगतमा धेरैलाई ठगेको र माओवादी अध्यक्ष प्रचण्डलाई पनि दुई पटक ठगेको आरोप लगाए । ‘त्यसैले प्रतिगमनसँग होइन अग्रमगनसँग सहकार्य गरौं’ उनले भने–‘भोलि जसपालाई पनि नठग्लान भन्न सकिन्न।’