राष्ट्रिय प्रजातन्त्र पार्टीका अध्यक्ष कमल थापाले विदेशीको इशारामा लादिएको एजेन्डाले मुलुकको स्वाधीनता कमजोर हुने बताएका छन्।

राप्रपा हेटौँडा नगर समितिका नवनिर्वाचित कार्यसमितिको शपथग्रहण कार्यक्रममा उनले भने–‘गणतन्त्र ,धर्मनिरपेक्षता र संघीयता विदेशीले बोकाइदिएको भारी हो, विदेशीको स्वार्थपूर्ति गर्न राजनीतिक दल र नेताहरू प्रयोग हुनु दुर्भाग्यपूर्ण हो ।’

२०६२/६३ को परिवर्तनपछि मुलुकमा विदेशी हस्तक्षेप बढेको पनि उनले वताए । नेपालमा सबै शक्ति र विचार अटाउन सक्ने मौलिक व्यवस्थाको चाहिएको वताएका उनले निषेधको राजनीति अन्त्य गर्न आग्रह गरे। ‘सबै अट्न सक्ने राजनीतिक प्रणालीको विकास गरौँ, जसले मुलुकलाई सवल, समृद्ध र स्वाधीन बनाउन सकोस्’– उनले भने।

भ्रष्टाचार, बेरोजगारी, धर्मपरिवर्तन र कुशासनको चक्र तोड्नका लागि राप्रपा बलियो हुनुपर्ने भन्दै थापाले काङ्ग्रेस र कम्युनिस्टको मार्गचित्र असफल भएको दाबी गरे ।