जनता समाजवादी पार्टी नेपालका सांसद राजकिशोर यादवले मिडियामा जसपा फुटको हल्ला आएको भन्दै आफुहरु कुनै लोभ लालचमा नफस्ने र पार्टी नफुटाउने बताएका छन् ।

जसपाको महन्थ ठाकुर, राजेन्द्र महतो लगायतको समुह सरकारमा जाने तथा वावुराम–उपेन्द्र समुह माओवादी केन्द्रसँग एकीकरण गर्ने हल्ला चलिरहेका वेला यादवले यस्तो वताएका हुन् ।

शुक्रवार प्रतिनिधि सभाको बैठकमा बोल्दै सांसद यादवले सत्ता सहकार्यको विषयलाई पनि पार्टी फुटको आधार वनाईएको भन्दै जसपाले सही समयमा सही निर्णय लिने वताए । उनले भने–‘सहमतिको राजनीतिलाई अगाडि बढाउनुस्, हाम्रो दल त्यसको लागि तयार छ । जनता समाजवादी पार्टी एकढिक्का छ र कसैको कारणले हामी फुट्नेवाला छैनौँ । हामी कुनै लोभ, लालचमा फस्नेवाला छैनौँ । हामी विवेकपूर्ण, देशको हितमा, हामी यो देशलाई अगाडि बढाउनका लागि सही समयमा सही निर्णय लिन्छौँ ।’ 

रेशम चौधरीको रिहाइको विषलाई सरकारले लेनदेनको विषय वनाएको भन्दै उनले दुःख ब्यक्त गरे । संविधान संशोधन र रेशम चौधरी रिहाइको कुरा गर्दा त्यसलाई लेनदेनको विषय वनाउन नहुने उनको भनाई छ । 

चौधरीलाई लेनदेनको विषय बनाइए राजनीतिक बेइमानी हुने वताएका उनले सिके राउत तथा नेत्र विक्रम चन्द विप्लवसँग वार्ता गरेर सरह नै थारुहट आन्दोलनकारीसँग पनि ब्यवहार गर्नु पर्ने वताए । आन्दोलनकारीलाई राजबन्दीसरहको व्यवहार हुनुपर्ने र राजनीतिक समस्याको रूपमा लिएर समस्या समाधान गरिनुपर्ने उनको भनाई थियो ।

‘हामी संविधान संशोधनका कुरा गर्दा तपाईँहरू सरकारमा आइदिनु प¥यो भन्नु हुन्छ। रेशम चौधरीको कुरा गर्दा सरकारको लेनदेनको विषय बनाउँछ’ उनले भने–‘मलाई लाग्छ, रेशम चौधरी सरकारको लेनदेनको विषय हुनु हुँदैन । त्यो सर्तको रूपमा बुझ्नु हुँदैन, नत्र त्यो राजनीतिक बेइमानी हुन्छ । त्यो राष्ट्रिय समस्या हो । रेशम चौधरी राजबन्दी हो । थारुहट आन्दोलनमा भएका सम्पूर्ण आन्दोलनकारीसँग राजबन्दी सरह व्यवहार गरेर राजनीतिक समस्या जसरी समाधान हुन्छ त्यसरी गरेर समाधान गर्नुपर्छ ।’