नेपाली कांग्रेसका वरिष्ठ नेता रामचन्द्र पौडेलले अरु राजनीतिक पार्टीलाई सरकारको नेतृत्वमा अघि सारेर भए पनि प्रधानमन्त्री केपी शर्मा ओलीको विकल्पमा जानुपर्ने बताएका छन् ।

नेपाल ट्रेड युनियन कांग्रेसका संस्थापक अध्यक्ष गिरिजाप्रसाद कोइरालाको ११औँ स्मृति सभामा बोल्दै नेता पौडेलले नेपाली कांग्रेसले ओलीको विकल्प खोज्नुपर्ने बताएका हुन् ।

उनले भने–‘अहिलेको संसदमा रहेको हाम्रो पार्टीको नेतृत्वले गर्ने काम, संसदमा रहेका पार्टीहरु मध्ये को–को सँग मिलाएर÷मिलेर के गरेर हुन्छ कसैलाई अगाडी बढाएर हुन्छ कि, आफु अगाडी बढेर हुन्छ कि अहिलेको केपी ओली जसले यत्रो ठुलो उत्पात गरे । उधुम गरे । तिनको विकल्पमा नयाँ सशक्त विकल्प नेपाली कांग्रेसले प्रस्तुत गर्नका लागि समायोजनको संयोजकको भूमिका नेपाली कांग्रेसजस्तो पार्टीले खेल्नुपर्छ।’

कांग्रेसले सबै पार्टीलाई समायोजन गर्ने हैसियत राख्नुपर्ने उनले वताए । ‘देशलाई ठिक दिशा दिने हैसियत राख्नुपर्छ । देशलाई अन्योलमा राख्ने होइन’ उनले थपे–‘अहिलेको अन्योललाई अन्त्य गर्ने हैसियत नेपाली कांग्रेसले राख्नुपर्छ । नेपाली कांग्रेसको नेतृत्वले राख्नुपर्छ । नेपाली कांग्रेसको नेतृत्वले राष्ट्रको नेतृत्व दिने यस्तै बेलामा हो ।’ नेतृत्वले कर्तव्यच्युत भएर बस्ने बेला नभएको उनको भनाई छ ।

नेपाली कांग्रेसले चुनावको पक्षमा वकालत गर्नु नहुने पौडेलले वताए । संसदमा भएका शक्तिहरुलाई समायोजन गरेरै विकल्प दिनुपर्नेमा उनको जोड छ ।

नेता पौडेलले लोकतन्त्र पक्षधरहरुको सरकार दिनुपर्ने बताए । संविधान बचाउने सरकार ल्याउन र व्यवस्था बचाउने शक्ति यही संसदभित्र निर्माण गर्न नेपाली कांग्रेसले लाग्नु पर्ने उनले वताए ।