नेपालका लागि पाकिस्तानी राजदूत सैयद हैदर शाहले बिहीबार सभामुख अग्निप्रसाद सापकोटासँग शिष्टाचार भेट गरे। 

सिंहदरबारस्थित सभामुखको कार्यकक्षमा भएको भेटमा सापकोटाले राजदूत शाहलाई सफल कार्यकालको शुभकामना दिए । सभामुख सापकोटाले नेपाल र पाकिस्तानबीच ६१ वर्ष लामो कूटनीतिक सम्बन्ध रहेको स्मरण गर्दै यस विचमा कहिल्यै तिक्तता नआएको वताए ।

उनले निर्मल पूर्जा मगर नेतृत्वको नेपाली हिमाल आरोहीले यसै वर्ष पाकिस्तानको केटु हिमाल आरोहणमा प्राप्त गरेको ऐतिहासिक सफलतापछि पाकिस्तानका प्रधानमन्त्री, सेना प्रमुख लगायतले गरको स्वागतका लागि आभार व्यक्त गरे ।

सङ्घीय संसद्मा नेपाल–पाकिस्तान संसदीय मैत्री समूह रहेको जानकारी गराउँदै सभामुख सापकोटाले संसद्–संसदबीचको सम्बन्धलाई थप विकास, विस्तार र सुदृढीकरण गर्दै दुवै देशको समृद्धिका सम्भावना खोज्दै अघि बढ्न सकिने बताए ।

राजदूत शाहले पर्वतारोहण, जलविद्युतलगायत क्षेत्रमा सहकार्यका सम्भावना खोज्न पहल गर्ने वताए ।