नेपाली कांग्रेसका नेता गगनकुमार थापाले देशलाई अनिर्णयको अवस्थामा राख्ने अधिकार कसैसँग नभएको बताएका छन् ।

वुधवारको संसद वैठकपछि पत्रकारसँग कुरा गर्दै उनले अबको एक हप्ता भित्र सबै विषय टुङ्गिनुपर्ने वताए । ‘हामीले पनि लामो समयसम्म संसद र देशलाई अलमलमा राख्नुहुन्न। माओवादी केन्द्रले पनि समर्थन फिर्ता लिने÷नलिने तत्काल निर्णय गर्नुपर्छ । जसपाले पनि प्रधानमन्त्री ओलीलाई समर्थन गर्ने भए गर्ने भनोस्’– उनले भने।

नेकपा दुईटा पार्टी भएपछि नेपाली कांग्रेसलाई पनि सरकार वनाउने उत्तिकै अधिकार भएको वताएका उनले भने–‘हामीले पनि माओवादी र जसपासँग निर्णायक वार्ता गरेर समर्थन लिन सक्छौँ, हामीले समर्थन लिएर सरकार बनाउने भनौँ । अब सरकार चलाउने इच्छा छैन भने छैन भनेर भनौँ ।’

संसद्लाई किंकर्तव्यविमूढ जस्तो अवस्थामा राख्न नहुने उनको भनाई छ । ‘यो देशप्रतिको घात हो । हामी सबै मिलेर गरिरहेका छौँ–अहिले’ उनले थपे–‘अनिर्णयको अवस्थामा राख्ने अधिकार हामी कोहीसँग पनि छैन । अब ढिलोमा एक हप्ताभित्रमा यो सबै कुरा हामीले टुङ्ग्याउनुपर्छ ।’