सप्तरीमा प्रहरीले कटुवा पेस्तोलसहित २ युवकलाई पक्राउ गरेको छ ।

सदरमुकाम राजविराजबाट उनीहरुलाई पक्राउ गरिएको हो । बिष्णुपुर गाउँपालिका–७ का २० वर्षीय महेशकुमार शर्मा र वडा नं.–५ का १९ वर्षीय प्रमोद साह पक्राउ परेका हुन् ।

वडा नं. ७ का शर्मा हातहतियार खरखजाना मुद्दामा ११ महिना कारागारमा थुनामा पनि वसेका थिए । स.७ प ९६७० नम्बरको मोटरसाइकल चालक शर्मा र मोटरसाइकलमा सवार साहलाई राजविराज नगरपालिका–६ बाट पक्राउ गरिएको एसपी राजेन्द्रप्रसाद धमलाले बताए ।

विशेष सूचनाका आधारमा जिल्ला प्रहरी र वडा प्रहरी कार्यालय राजविराजको टोलीले उनीहरुलाई पक्राउ गरेको हो । शर्माको साथबाट एक थान कटुवा पेस्तोल र दुई थान गोली बरामद भएको छ ।

शर्मा यसअघि ०७४ जेठ १३ गते एक थान कटुवा पेस्तोल र सो मा लाग्ने तीन थान गोलीसहित पक्राउ परेका प्रहरीले जनाएको छ।