परीक्षण नै नगरी पिसिआर नेगेटिभ रिपोर्ट बनाएको आरोपमा राजधानीको सिनामंगलस्थित सुरिया हेल्थ केयरका सञ्चालक खेलानन्दप्रसाद सिंह पक्राउ परेका छन् ।

महानगरीय अपराध महाशाखाको प्रहरी टोलीले ल्याबमा छापा मारेर सिंहलाई पक्राउ गरेको हो । ल्याववाट प्रहरीले नेगेटिभ नतिजा उल्लेखित ४ वटा नक्कली पीसीआर रिपोर्ट पनि प्रहरीले बरामद गरेको छ ।

नक्कली पीसीआर रिपोर्ट तयार गर्ने गरेको उजुरीपछि केही दिनयता ल्याबमाथि अनुसन्धान भइरहेको र प्रमाण फेला परेपछि पक्राउ गरिएको प्रहरीले जनाएको छ । सुरिया हेल्थ केयरबाट गरेका सबै पीसीआर रिपोर्टबारे पनि अनुसन्धान थालिएको प्रहरीको भनाई छ।

वैदेशिक रोजगारीमा जानेलाई ल्याववाट प्रति रिपोर्ट ९ हजारसम्म लिएर नक्कली रिपोर्ट दिने गरिएको थियो । ल्यावले दुई घण्टामै पिसिआरको रिपोर्ट दिने गरेको खुलेको छ ।