अघिल्लो दिन वेपत्ता भएका मनाङे भोलीपल्ट मन्त्री, लिए सपथ
गण्डकी प्रदेशका स्वतन्त्र सांसद राजीव गुरुङ (दीपक मनाङे) ले युवा तथा खेलकुद मन्त्रीको सपथ लिएका छन् ।
मुख्यमन्त्री पृथ्वीसुब्बा गुरुङको उपस्थितीमा प्रदेश प्रमुख अमिक शेरचनले उनलाई सपथ गराएका हुन । सरकार विरुद्ध अविश्वासको प्रस्ताव आएका बेला मुख्यमन्त्री पृथ्वीसुब्बा गुरुङले मन्त्रिपरिषद् विस्तार गरेर मनाङेलाई मन्त्रीमा नियुक्ती गर्नुलाई अर्थपुर्ण रुपमा लिईएको छ ।
मुख्यमन्त्री गुरुङ्गले सामाजिक विकास मन्त्रालय टुक्र्याएर मनाङेलाई मन्त्री बनाएका हुन् । माओवादी केन्द्रका मन्त्रीले राजीनामा दिएपछि आन्तरिक मामिला तथा कानुन मन्त्रालय र भूमि व्यवस्था, कृषि तथा सहकारी मन्त्रालय भने खाली नै छन् ।
कानुन मन्त्रालयको जिम्मा भौतिक पूर्वाधार विकास मन्त्री रामशरण बस्नेत र कृषि मन्त्रालय मुख्यमन्त्री गुरुङले आफैंले राखेका छन् ।
मनाङे मनाङ प्रदेश ‘ख’ स्वतन्त्र सांसदका रुपमा विजयी भएका थिए । बुधबार मुख्यमन्त्रीविरुद्धको अविश्वासको प्रस्तावमा तय भएको मतदानका बेला भने उनी उपस्थित भएका थिएनन् । उनको यहि योगदानका कारण मन्त्री वनाईएको चर्चा छ।
