सरकारले निजी अस्पताललाई कोरोना अस्पतालका रुपमा प्रयोग गर्ने गरी तयारी थालेको छ । 

कोरोना रोकथाम तथा नियन्त्रण गर्न गठित सीसीएमसी निर्देशक समितिले निजी अस्पतालहरुलाई कोभिड अस्पतालको रुपमा प्रयोग गर्न तयारी थाल्ने निर्णय गरेको हो ।

शुक्रबार सिंहदरबारमा बसेको निर्देशक समिति बैठकले कोरोना संक्रमण उच्च रहेको र निषेधाज्ञा लागू गरिएका जिल्लामा थप कडाई गर्ने र निजी अस्पतालहरुलाई कोभिड अस्पतालको रुपमा प्रयोग गर्ने निर्णय गरेको हो ।

यसैगरी नेपालको भारततर्फ खुलेका ३५ नाकामध्ये १३ नाका मात्रै सञ्चालनमा ल्याउने निर्णय गरेको छ । सरकारले क्वारेण्टाइनसहित खुला राखेका नाकाहरू काँकडभिट्टा, जोगबनी, पशुपतिनगर, भिठ्ठामोड, गौर, वीरगञ्ज, बेलहिया, कृष्णनगर, जमुनाहा, झुलाघाट, कोलुघाट, गौरीफन्टा र गड्डाचौकी रहेका छन् ।

निषेधाज्ञा लागू भएका जिल्लामा एक चौथाइ कर्मचारी राखेर कार्यालय सञ्चालन गर्ने निर्णय गरेको छ । 

यस्तै सङ्घीय मन्त्रीलाई प्रदेश समन्वय गर्ने गरी खटाउन मन्त्रिपरिषदमा सिफारिस पनि गरेको छ । यसका साथै बैठकले सार्वजनिक निर्माणका सम्पूर्ण काम बन्द गर्ने निर्णय पनि गरेको छ । यदि निर्माण कार्य सुरु गर्ने भए कामदार, कर्मचारीलाई निमार्णस्थलमा नै राख्नुपर्ने छ । उद्योगहरू सञ्चालन गर्ने भए मजदुर, कर्मचारीलाई उद्योग परिसरभित्र नै रहने गरी सञ्चालन गर्न निर्देशन पनि दिएको छ ।

विदेशबाट नेपाल आएका विदेशीले क्वारेण्टाइन बस्न अनिवार्य गर्ने र नमाने डिपोट गर्ने पनि निर्णय गरेको छ । क्वारेण्टाईनका रूपमा रहेका होटललाई थप व्यवस्थित गर्ने निर्णय बैठकले गरेको छ ।