कर्णाली प्रदेशको नेकपा (एमाले) संसदीय दलको बैठकले सरकारवाट आफना मन्त्रीहरुलाई फिर्ता वोलाउने निर्णय गरेको छ। दलको वैठकले सरकारमा रहेका मन्त्रीलाई २४ घण्टाभित्र राजीनामा गर्न भनेको छ ।

संसदीय दलका नेता यामलाल कँडेलको अध्यक्षतामा बसेको बैठकले ४ चैतमा सरकारलाई दिएको समर्थन फिर्ताको प्रस्तावलाई सदर गरेको प्रमुख सचेतक गुलावजंग शाहले जानकारी दिए । यो बैठकमा माधवकुमार नेपाल समूहका सांसदहरू पनि सहभागी थिए ।

कर्णाली प्रदेश सरकारमा एमालेबाट आर्थिक मामिलामन्त्री प्रकाश ज्वाला, सामाजिक विकासमन्त्री दल रावल र पर्यटन, उद्योग, वन तथा वातावरणमन्त्री नन्दसिंह वुढा मन्त्री छन् । तीनै जना मन्त्रीले सोमबारसम्म राजीनामा दिने जनाईएको छ ।

बैठकले संसदीय दलको विधान संसोधन गर्ने समेत निर्णय गरेको छ। विधान संशोधनका लागि प्रमुख सचेतक शाहको संयोजकत्वमा करवीर शाही र मीना रखाल सम्मिलित विधान मस्यौदा समिति गठन गरेको छ ।

वैठकले मुख्यमन्त्रीलाई मार्ग प्रशस्त गर्न आग्रह गर्ने निर्णय पनि गरेको छ । 

कर्णाली प्रदेश एमाले फिर्ता मन्त्री