एमालेका निलम्वित नेता माधव कुमार नेपाल समूहले अष्टलक्ष्मी शाक्यको नेतृत्वमा बागमती प्रदेशमा समानान्तर कमिटी घोषणा गरेको छ। 

१७५ सदस्यिय कमिटीको सहसंयोजकमा केदार न्यौपाने, अरुण न्यौपाने र पशुपति चौलागाईं छन् भने सदस्यमा  वसन्त मानन्धर, विष्णु देवकोटा, पेम्बा तामाङ, टोकबहादुर वाइबालगायत छन्। 

यसको दुई दिन अघि नेपाल पक्षको काठमाडौं जिल्ला कमिटी घोषणा भएको थियो । वसन्त मानन्धरको नेतृत्वमा गठित कमिटीमा २५० जना सदस्य छन्।

वरिष्ठ नेता माधवकुमार नेपाल, उपाध्यक्ष भीम रावल, उपमहासचिव घनश्याम भुसाल र स्थायी कमिटी सदस्य सुरेन्द्र पाण्डेलाई प्रधानमन्त्री एवम् अध्यक्ष केपी शर्मा ओलीले ६ महिनाका लागि निलम्वन गरेपछि नेपाल समुह सामानन्तर कमिटी विस्तारमा लागेको हो ।

ओली पक्षले भने समानान्तर कमिटी वनाउने र कमिटीमा वस्ने सवैलाई कारवाही गर्ने जनाएको छ । जस अनुसार मंगलवारै  अनेरास्ववियुका तीन नेतालाई साधारण सदस्य समेत नरहने गरी निस्कासन गरिएको छ ।

सोमबार प्रतिनिधिसभाको बैठकपछि एमालेका प्रमुख सचेतक विशाल भट्टराईले समानान्तर कमिटी गठन गर्न उद्दत हुने र त्यो कमिटीमा बस्ने सबैलाई पार्टीले कारबाही गर्ने बताएका थिए ।

बागमती प्रदेश अष्टलक्ष्मी शाक्य समानान्तर कमिटी