कर्णाली प्रदेशमा माओवादीवाट मुख्यमन्त्री वनेका महेन्द्रवहादुर शाहीले राजिनामा दिने र एमालेको नेतृत्वमा सरकार गठन गर्ने गृहकार्य सुरु भएको छ । 

एमाले संसदीय दलले चैत ४ गते सरकारलाई दिएको समर्थन फिर्ता लिएको छ भने सरकारमा सहभागी तीन जना मन्त्रीले चैत २४ गते राजीनामा दिएका थिए । एमाले मन्त्रीले राजिनामा दिएपछि कर्णाली प्रदेश सरकारको नेतृत्व १२ जना सांसद रहेको माओवादी केन्द्रले गरिरहेको छ ।

माओवादीका १३ जना सांसदमध्ये दैलेखबाट निर्वाचित धर्मराज रेग्मी एमाले प्रवेश गरेपछि अहिले १२ जना सांसद छन्। ४० सदस्यीय कर्णाली प्रदेशसभामा एमालेका २०, कांग्रेसका ६ र राप्रपाका १ जना सांसद छन् । यो अवस्थामा मुख्यमन्त्री शाही नेतृत्वको सरकार अल्पमतमा परेको छ।

एमालेका सांसदहरुले भने अव मुख्यमन्त्री शाहिले राजिनामा दिएर मार्ग प्रशस्त गर्नुपर्ने वताएका छन् । संविधानको धारा १६८ (२) अनुसार दुई वा दुईभन्दा बढी दलको समर्थनमा बहुमत प्राप्त प्रदेशसभा सदस्यलाई मुख्यमन्त्री नियुक्त गरिएको थियो । यसरी बनेको सरकारलाई समर्थन गरेको दलले समर्थन फिर्ता लिए मुख्यमन्त्रीले राजीनामा दिनुपर्छ वा ३० दिनभित्र विश्वासको मत लिनुपर्छ । मुख्यमन्त्री शाहीले भने राजीनामा दिएका छैनन् र विश्वासको मत लिन संसद् अधिवेशनसमेत बोलाइएको छैन ।

शाही विश्वासको मत लिने प्रयासमा त छन् उनको यो प्रयासमा कांग्रेस र राप्रपाको समर्थनले मात्र पुग्दैन, एमालेका कम्तीमा दुई जना सांसदको पनि साथ आवश्यक पर्छ । मुख्यमन्त्री शाहीले राजीनामा नदिए पनि वैशाख सुरुवातमै नयाँ सरकार गठनको प्रक्रिया सुरु हुनेछ ।