नेकपा एमालेका नेता भीम रावलले केपी शर्मा ओलीलाई पुनः प्रधानमन्त्री हुनवाट रोक्न सांसद पदबाट राजीनामा दिनुपर्ने सुझाएका छन् ।

उनले वुधवार ट्वीट गर्दै यस्तो सुझाव प्रश्तुत गरेका हुन् ।

‘असाधारण समस्याको समाधान गर्न असाधारण पाइला चाहिन्छ। थप राष्ट्रिय हित, पार्टी विधानविपरीत र अलोकतान्त्रिक कार्य गर्नबाट प्रम केपीलाई रोक्न पदमुक्त गर्नु आवश्यक छ’ उनले लेखेका छन्–‘त्यसका लागि हामीले सांसद पदबाट राजीनामा गरी स्थिति निर्माण गर्नुपर्छ। यो राजनीतिक नैतिकता र कानूनी दृष्टिले धेरै उचित छ।’

एमालेको माधव नेपाल पक्षभित्र सामूहिक राजीनामा चर्चा चलिरहेका बेला रावलले पनि राजीनामा दिनुपर्ने मत सार्वजनिक गरेका हुन् ।

तर, नेपाल पक्षभित्र सामूहिक राजीनामा दिने कुरामा एकमत बन्न सकिरहेको छैन । नेताहरु घनश्याम भुसाल, गोकर्ण विष्ट, योगेश भट्टराई लगायतका नेता राजीनामाको विपक्षमा छन् ।