महन्थ ठाकुरलाई नै प्रधानमन्त्री बनाउने प्रस्ताव आउदा पनि जसपाको ठाकुर–महतो पक्ष सहमतिमा नआएपछि वहुमतको सरकार वन्ने सम्भावना लगभग टरेको छ । 

जसपा एक गराउन नसकेपछि नेपाली कांग्रेसका सभापति शेरबहादुर देउवाको सत्तारोहण असम्भव देखिएको छ।

वरिष्ठ नेता रामचन्द्र पौडेललगायतका नेताले पार्टीभित्र निकै दबाब र प्रधानमन्त्री केपी शर्मा ओलीसँग देउवाको गठजोड भन्दै चर्चा चलेपछि सरकार वनाउन तम्सिएका देउवा जसपाको चाला देखेपछि पछि हटेको एक नेताले जानकारी दिए ।

माओवादीले पहिले नै देउवालाई समर्थन गरेको घोषणा गरिसकेको छ । एमालेले माधवकुमार नेपाल समूह आएपनि सिंगो जसपा नआएसम्म सरकार बन्ने अवस्था नरहेकाले त्यति देउवाले जोड नगरेको ती नेताले बताए । 

जसपा एकढिक्का भएर समर्थन नगरेसम्म प्रधानमन्त्रीको ढोका नखुल्ने स्पष्ट रहेको भन्दै देउवाले हरेक वार्तामा जसपाका नेताहरूलाई एक ढिक्का भएर आउन भन्दै आएका थिए । 

यस विषयमा आजै देउवा र माओवादी अध्यक्ष पुष्पकमल दाहालबीच बुढानिलकण्ठमा छलफल भएको थियो ।
 
नयाँ संविधानको धारा ७६ (२) को व्यवस्था बमोजिम वहुमतको सरकार वन्न नसके धारा ७६ (३) अनुरुप प्रधानमन्त्री नियुक्त हुने प्रक्रिया अघि बढ्ने छ । श्रोतका अनुसार केपी शर्मा ओली आज राती नै पुनः प्रधानमन्त्री वन्ने सम्भावना छ।