नेपाल कम्युनिष्ट पार्टी (एमाले)को स्थायी कमिटी बैठकले नेता माधवकुमार नेपाललाई गरेका कारवाही फिर्ता लिने निर्णय गरेको छ।

शुक्रवार बिहान बालुवाटारमा बसेको बैठकले नेता, भीम रावल, घनश्याम भुसाल र सुरेन्द्र पाण्डेलाई गरिएको निलम्बनको कार्बाही फुकुवा गर्ने निर्णय गरेको हो ।

वैठकले पार्टीभित्र र राष्ट्रिय राजनीतिमा विकसित नयाँ परिस्थितिका सन्दर्भमा आवश्यक निर्णय लिने अधिकार अध्यक्ष केपी शर्मा ओलीलाई प्रत्यायोजन गरेको छ भने केन्द्रीय सदस्य एवं वागमती प्रदेशसभा सदस्य पशुपति चौलागाईको कोरोनाका कारण भएको निधनप्रति श्रद्धाञ्जली व्यक्त गरेको छ । 

त्यस्तै, बैठकले अक्सिजनको पर्याप्त, प्रभावकारी र नियमित आपूर्ति, खोप लगायत जीवनरक्षक औषधिहरूको प्रबन्ध, अस्पतालहरूको पूर्वाधार विस्तार लगायत कामका लागि राज्यको सम्पूर्ण शक्ति परिचालित गर्न र मित्र राष्ट्रहरूबाट आवश्यक सहायता जटाउन थप कुटनीतिक पहल गर्न सरकारलाई सुझाव दिएको र प्रम ओलीले कोभिड महामारीको पछिल्लो जटिल अवस्था र यसको सामना गर्न सरकारले चालिरहेका कदमहरूका सन्दर्भमा बैठकलाई जानकारी गराएका थिए ।