स्वास्थ्य तथा जनसंख्या मन्त्रालयले अस्पताल तथा प्रयोगशालाहरूलाई आवश्यक तीन महिनालाई पुग्ने स्वास्थ्य सामग्री मौज्दात रहेको जानकारी दिएका छन् ।

यसैगरी, नेपालमा २५ लाख डोज कोरोना भाइरसविरुद्धको खोप लगाइसकिएको सह–प्रवक्ता समिर अधिकारीले जानकारी दिएका छन् ।

नेपालमा हालसम्म ३२ लाख ४८ हजार मात्रा खोप आएको छ । भारत सरकारले उपहारस्वरुप दिएको कोभिशिल्ड खोप १० लाख, भारतसँगै खरिद गरिएको १० लाख, कोभ्याक्स सुविधा अन्र्तगत ३ लाख ४८ हजार र नेपाली सेनालाई प्राप्त १ लाख गरी २४ लाख ४८ हजार डोज कोभिशिल्ड खोप प्राप्त भएको अधिकारीले वताए ।

यस्तै, चीनबाट ८ लाख डोज भेरोसेल खोप प्राप्त हुँदा जम्मा ३२ लाख ४८ डोज खोप प्राप्त भएको र त्यसमध्ये २५ लाख डोज खोप लगाइसकिएको छ। बाँकी रहेको खोप लगाउने क्रम जारी रहेको मन्त्रालयले जनाएको छ । 

भारतसँग २० लाख डोज खोप खरिद गरेको भए पनि १० लाख मात्रै आएको र १० लाख डोज आउन बाँकी रहेको छ। रुसले उत्पादन गरेको ‘स्पुतनिक–भी’ खोप लगायतका अन्य खोपहरू ल्याउने सम्बन्धमा समन्वय भइरहेको मन्त्रालयले जनाएको छ ।