कोरोना संक्रमितको संख्या दिनहुँ बढे सँगै अस्पतालमा रगत चरम अभाव देखिएको छ। यो अभावको पूर्तिका लागि विभिन्न तीन वटा संस्थाको संयुक्त आयोजनामा रक्तदान कार्यक्रम सम्पन्न भएको छ ।

निषेधाज्ञा कै बीचमा आकस्मिक रक्तदान शनिवार सम्पन्न भएको रक्तदान कार्यक्रममा २३ पिन्ट रगत संगलन भएको छ। रक्तदाताहरु मध्ये अधिकांश पत्रकार छन्। विभिन्न अनलाइन, टेलिभिजन र प्रिन्ट मिडियाका ११ जना पत्रकारले रक्तदान गरेको लायन्स क्लब अफ काठमाडौं सोसियल फ्रेन्डसका अध्यक्ष भुषणकुमार श्रेष्ठले जानकारी दिए ।

रक्तदानमा पुरुष भन्दा महिलाको संख्या बढी देखिएको थियो। करिब २ घण्टा चलेको कार्यक्रममा २३ पिन्ट रगत जम्मा गरिएको आयोजक श्रेष्ठले बताए। 

सामान्य गर्भवती महिला र अप्रेसन गर्नुपर्ने बिरामीका लागि समेत रगत अभाव भएपछि अप्रेसन र अन्य उपचार सेवा रोकिन नदिन रक्तदान कार्यक्रमको आयोजना गरिएको अध्यक्ष श्रेष्ठले बताए ।

आगामी दिनमा पनि हरेक दुई–दुई हप्तामा रगत संकलन गरेर रेडक्रसलाई बुझाउने तयारी गरिएको आयोजकको भनाई छ। ‘निषेधाज्ञाकाबीच हामी बाहिर निस्कन सक्ने अवस्थामा छैनौं । तर अत्यन्त आकस्मिक पर्यो भने जीवनरक्षाका निम्ति जस्तो पनि सहयोग गर्न तयार छौ’ अध्यक्ष श्रेष्ठले भने–‘कोरोना संक्रमणको जोखिमलाई मध्यनजर गर्दै आवश्यक स्वास्थ्य मापदण्ड अपनाएर फेरी पनि रक्तदान कार्यक्रम आयोजना गरिने छ ।’

रक्तदान कार्यक्रम अटो नेपाल, सहयोगी महिला जागरण मञ्च र लायन्स क्लब अफ काठमाडौं सोसियल फ्रेन्डको संयुक्त आयोजनामा रातोपुलमा भएको थियो। यस कार्यक्रममा सहभागी हुन बुढानिलकण्ठदेखि भक्तपुरसम्मका रक्तदाता आएका थिए ।

फेसबुकमा जानकारी पाएकै आधारमा रक्तदान कार्यक्रममा सहभागि भएकाहरुलाई आयोजक श्रेष्ठले धन्यवाद दिएका छन् ।