सुनसरीको धरानमा कोरोनाको वहानामा एम्वुलेन्समा गाँजा तस्करी हुने गरेको पाईएको छ । गैर सरकारी संस्थाले सञ्चालन गरेको एउटा एम्बलेन्समा गाँजा ओसार पसार गरेको आरोपमा धरानका दुई युवा पक्राउ परेपछि यो तथ्य सार्वजनिक भएको हो ।

हुडेक नेपालले सञ्चालन गरेको को १ च ५५५९ नम्बरको एम्बुलेन्समा सय किलो गाँजासहित एम्बुलेन्स चालक धरान १५ बाझगरा बस्ने ३६ वर्षीय बलबहादुर लिम्बु र धनकुटाको सहिदभूमि गाउँपालिका १ घर भई हाल धरान ११ बस्ने २८ वर्षीय पोशण राईलाई पक्राउ परेका छन् ।

धनकुटाबाट धरानतर्फ आइरहेको एम्वुलेन्स सोमवार राती जिरोपोइन्ट चेकपोस्टवाट प्रहरीले गाँजासहित नियन्त्रणमा लिएको छ । एम्बुलेन्सको पछाडिको भागमा २५ केजी दरको ४ वटा झोलामा सयकिलो गाँजा राखेको पाइएपछि गाँजा ओसार पसार र बिक्रिवितरण गरेको अभियोगमा बलबहादुर र पोशण पक्राउ परेको इलाका प्रहरी कार्यालय धरानका इन्स्पेक्टर हेमराज ओलीले वताए ।

उनीहरुलाई लागूऔषध मुद्दामा म्याद थप गरि थप अनुसन्धान भइरहेको प्रहरीले जनाएको छ ।

कोरोना माहामारीका कारण देशमा अधिकांश भागमा निषेधाज्ञा जारी गरेर सर्वसाधारण र निजी तथा सार्वजनिक यातायात सञ्चालनमा रोक लगाइएको छ। तर, एम्बुलेन्स सञ्चालन भईरहेका छन् ।