कोरोना संक्रमण पुष्टि भएपछि ललितपुरस्थित मेडिसिटी अस्पतालमा उपचाररत विवेकशी साझा पार्टीका नेता उज्वल थापाको पीसीआर परीक्षणको रिपोर्ट नेगेटिभ आएको छ । 

विवेकशील साझाका संयोजक मिलन पाण्डेका अनुसार पछिल्लो रिपोर्ट नेगेटिभ देखिएको हो । ‘ग्राण्डीमा उहाँ सिकिस्त हुँदा पनि रिपोर्ट नेगेटिभ नै थियो । त्यसपछि मेडिसिटीमा पीसीआर परीक्षण गर्दा पोजिटिभ आयो,’ उनले भने–‘पछिल्लो रिपोर्ट नेगेटिभ आउनु सुखद् छ । तर, स्वास्थ्य जटिलता अझै छ। ’

कोरोना संक्रमण भएपछि सुरुमा थापालाई ग्रान्डी अन्तर्राष्ट्रिय अस्पतालमा भर्ना गरिएको थियो । स्वास्थ्य अवस्था जटिल भएपछि इक्मो प्रविधिबाट थप उपचार गर्नुपर्ने भएपछि ग्राण्डी अस्पतालबाट थापालाई मेडिसिटी अस्पतालमा भर्ना गरिएको हो । नेपालमा इक्मो प्रविधिको उपचार मेडिसिटीमा मात्रै हुने गरेको छ।

यसअघि आइतबार साँझ विवेकशील साझा पार्टीका अध्यक्ष रवीन्द्र मिश्रले थापाको स्वास्थ्य अवस्थामा कुनै सुधार नआएको र अवस्था गम्भीर रहेको बताएका थिए ।