प्रधानमन्त्री एवम् नेकपा एमालेका अध्यक्ष केपी शर्मा ओली कांग्रेस सभापति शेरबहादुर देउवासँग भेट गर्न देउवा निवास बूढानीलकण्ठ पुगेका छन् ।

विपक्षी दलका नेता समेत रहेका देउवालाई भेटन उपप्रधानमन्त्री तथा एमाले महासचिव ईश्वर पोखरेल र संसदीय दलका उपनेता सुवास नेम्वाङ, गृहमन्त्री रामबहादुर थापा ‘बादल’ समेत पुगेका छन् । 

देउवा निवास पुगेका ओलीले पछिल्लो राजनीतिक घटनाक्रमबारे छलफल गर्ने बताइएको छ । जेठ ६ गते तय गरिएको वागमती प्रदेशतर्फको रिक्त राष्ट्रियसभा सदस्यको उपनिर्वाचन तथा वैशाख २७ गते प्रधानमन्त्री ओलीले विश्वासको मत लिने विषयमा देउवासँग छलफल हुने वताईएको छ ।

राष्ट्रिय सभाको रिक्त पदमा एमालेले बादललाई उम्मेद्वार बनाउने निर्णय गरिसकेको छ भने प्रधानमन्त्री ओलीले विश्वासको मत लिनका लागि वैशाख २७ गते प्रतिनिधिसभाको अधिवेशन आह्वान गरिसकेका छन् ।

कांग्रेसले प्रधानमन्त्रीलाई विश्वासको मत लिनबाट रोक्न माओवादी, जसपाको उपेन्द्र यादव पक्ष र एमालेकै माधव नेपाल पक्षसँग छलफल गरिरहेको छ । सोहि मेसोमा ओली पनि देउवा निवास पुगेको आँकलन गरिएको छ।