गण्डकी प्रदेश प्रमुखको निवासमा छिर्न खोज्दा रोकेपछि नेपाली कांग्रेसका सांसद मेखलाल श्रेष्ठले प्रहरीलाई ‘तपाईएको हिसाव किताव’ हुन्छ भन्दै धम्कि दिएका छन् । मुख्यमन्त्री पृथ्वी सुब्बा गुरुङ्गले संसद विघटन गर्न सक्ने आशंकामा शनिवार धर्ना दिन पुगेका सांसदलाई भित्र प्रवेश गर्न नदिएपछि श्रेष्ठले प्रहरीलाई धम्की दिएका हुन ।

धर्ना चलिरहँदा प्रदेश प्रमुख निवास वरपर प्रहरीको बाक्लो उपस्थिति थियो । सांसद, पत्रकारबाहेक अरुलाई प्रवेश निषेध थियो । त्यत्तिकैमा कांग्रेस सांसदले एक पुरुषलाई धर्ना स्थलमा लैजान खोज्दा विवाद सुरु भएको थियो ।

वडा प्रहरी कार्यालय बैदामका इन्स्पेक्टर श्याम थापा मगरसहितको टोली ती पुरुषलाई धर्नास्थल प्रवेशमा रोक लगापछि सांसद श्रेष्ठले ती युवालाई छोड्न भनेका थिए । तर, प्रहरीले नमानेपछि श्रेष्ठले ‘उहाँ पार्टीको नेता हो, के हो यो ? यही हो तानाशाह ?’ भन्दै धम्क्याएका हुन ।

उनले फर्किएर इन्स्पेक्टरलाई देखाएर भन्छन्, ‘तपाईंको हिसाबकिताब हुन्छ ।’ प्रहरी इन्स्पेक्टरले थापाले पनि उनलाई जवाफ फर्काएको भिडियो अहिले सामाजिक सञ्चालमा छ्यासछ्यास्ति भएको छ । उनले आफनो नेमप्लेट देखाउँदै भन्छन् ‘मेरो नाम श्याम थापा मगर हो । बैदाममा कार्यरत छु’ भनेपछि सांसद श्रेष्ठ आक्रोशमा आउँदै भन्छन्, ‘फुर्ति नछाँटम ।’

स्याङ्जाका घर भएका श्रेष्ठ कांग्रेसका समानुपातिक सांसद हुन् ।

कास्की प्रहरीले भने उक्त घटना सामान्य रहेको प्रतिक्रिया दिएको छ । सांसद श्रेष्ठले भने आफूले हिसाबकिताब हुन्छ भनेर प्रहरीलाई नभनेको दाबी गरेका छन् । 

गण्डकी प्रदेश पृथ्वी सुब्बा गुरुङ्ग मेखलाल श्रेष्ठ प्रहरीलाई धम्की